Gjekmarkaj takon homologun hungarez, Istvan Jakab, diskuton mbi farsën e 11 Majit dhe goditjen e opozitës

Gjatë vizitës zyrtare në Hungari, me ftesë të Nënkryetarit të Parlamentit Hungarez, Istvan Jakab, nënkryetari i Kuvendit Agron Gjekmarkaj zhvilloi një takim të rëndësishëm dhe konstruktiv me përfaqësuesin e partisë Fidesz të Kryeministrit Viktor Orban.

Gjekmarkaj bën të ditur se biseda u fokusua në marrëdhëniet tradicionale shqiptaro-hungareze, bashkëpunimin historik mes dy kombeve dhe rolin e Hungarisë në mbështetje të Shqipërisë gjatë rrugës drejt integrimit europian, si edhe në zhvillimet e fundit politike në vendin tonë.

Deklarata për Takimin me Nënkryetarin e Parlamentit Hungarez, z. István Jakab

Gjatë vizitës time në Hungari, me ftesë të Nënkryetarit të Parlamentit Hungarez, z. István Jakab, pata kënaqësinë të zhvilloj një takim të frytshëm me të, përfaqësues i partisë Fidesz të Kryeministrit Viktor Orbán. Në takim theksova miqësinë tradicionale dhe historike mes popujve tanë, që nga koha e heronjve kombëtarë Huniadi dhe Skënderbeu, deri te figura e Mbretëreshës Geraldinë, konteshë hungareze dhe pjesë e pandashme e historisë shqiptare.

Shpreha mirënjohjen për mbështetjen që Hungaria i ka dhënë Shqipërisë pas rënies së komunizmit, në të gjitha fushat, veçanërisht në procesin e integrimit europian. Theksova se Partia Demokratike – forca politike që e nisi dhe e udhëhoqi procesin e integrimit europian të Shqipërisë – e konsideron këtë një projekt kombëtar, jo partiak. PD e dëshiron fuqimisht integrimin dhe insiston që ai të avancojë,  duke përmbushur standardet dhe kriteret europiane.

Informova gjithashtu z. Jakab mbi zhvillimet e fundit politike në Shqipëri, përfshirë deformimet e konstatuara në zgjedhjet e 11 majit, si dhe arrestimin e liderit të opozitës, z. Sali Berisha, dhe drejtuesve të tjerë opozitarë gjatë procesit zgjedhor – veprime që i sollën avantazh të padrejtë palës kundërshtare. Nënvizova se raporti i OSBE/ODIHR për këtë proces ishte ndër më kritikët ndonjëherë për një proces zgjedhor në vendin tonë.

Në përfundim, përcolla përshëndetjet më të përzemërta të Kryetarit Berisha për Kryeministrin dhe mikun e tij, z. Viktor Orbán.