Institucionet shtetërore e kanë kaluar në heshtje ditën e shpalljes së Pavarësisë së Kosovës. Vetëm Drejtoria e Përgjithshme e Arkivit çeli një ekspozitë në kuadër të kësaj dite të shënuar. Drejtori i institucionit Ardit Bido u shpreh për Syri Tv se ëndrra e shqiptarëve është bashkimi i Kosovës me Shqipërinë, ndërsa kuratori i ekspozitës tha se Shqipëria i ka ende borxhe Kosovës.
Nga SYRI TV
17 Shkurti, Dita e 16-vjetorit të Shpalljes së Pavarësisë së Kosovës ndonëse duhet të ishte një ditë feste për shqiptarët, është kaluar si një ditë e zakonshme nga institucionet shtetërore.
Në ambientet e Kalasë së Tiranës vetëm Drejtoria e Përgjithshme e Arkivit përkujtoi përmes një ekspozite etapat historike nëpër të cilat ka kaluar Kosova, luftën e përgjakshme, mohimin e papërligjur nga serbët, deri në festën e hareshme, atë të shpalljes së Kosovës Republikë.
Drejtori i institucionit Ardit Bido përmes një vështrimi të imtësishëm tregoi ngjarjet historike më të rëndësishme që ka kaluar Kosova, që vijnë për shikuesit përmes ekspozitës.
Kalvarin e gjatë të vuajtjeve të shqiptarëve të Kosovës e përgjysmon krijimi i shtetit të pavarur, flamuri i të cilit valëvitet krenar, ndërsa Bido u shpreh për SYRI TV se ëndrra e shqiptarëve ka qenë bashkimi i Kosovës me Shqipërinë.
Hulumtues i ngjarjeve dhe dokumenteve që e shohin publikun me anën e errët që veshi Kosovën, kuratori i ekspozitës Denald Prifti tha se Shqipëria i ka ende borxhe Kosovës.
Ekspozita Rizgjimi në vlerat kombëtare ‘Kosova Republikë’ do të qëndrojë e çelur deri të dielën më datë 18 shkurt.
© SYRI.net