Dokumentari investigativ i kanalit shtetëror televiziv “RAI3” ka shkaktuar përplasjen e radhës në nisje të seancës së sotme plenare në Kuvendin.
Demokrati Gazment Bardhi kërkoi shpjegime nga kryetarja e Kuvendit se pse nuk është futur në rendin e ditës seanca e kërkuar me kryeministrin Edi Rama për këtë çështje.“E keni kthyer shkeljen e Kushtetutës në rutinë. Interpelancat për kryeministrin as nuk ja komunikoni seancës.
Kemi kërkuar një interpelancë urgjente me kryeministrin për një ndërhyrje skandaloze të kryeministrit tek mediat italiane.
Ju e keni rrëzuar kërkesën, dhe e kuptoj, sepse kryeministri ju ka dhënë urdhër ta mbroni, sepse ai ka frikë.
Arroganca juaj nuk mund t’i mbivendoset Kuvendit.
Është Kuvendi që do duhet të vendosë, por e kuptoj se ju keni frikë ta përmendni emrin e Kryeministrit”, iu drejtua Bardhi Nikollës.
Ndërsa në kundërpërgjigje, kreu i grupit parlamentar socialist Bledi Çuçi theksoi se për sa kohë edhe vetë RAI3 e shtyu transmetimin e pjesës së dytë të dokumentarit mbi emigrantët e paligjshëm dhe marrëveshjen Rama – Meloni për akomodimin e tyre në Shqipëri, atëherë dhe vetë kjo interpelancë nuk ka pse të trajtohet si “urgjente”.
© SYRI.net