Presidenti i sapozgjedhur i Shqipërisë Ilir Meta ka deklaruar se situata politike në Shqipëri është duke dëmtuar klimën e biznesit në vend.

Deklarata e metës erdhi gjatë një takimi me strukturat e lëvizjes së gruas për Integrim në njësinë 6 në Tiranë.

Gjatë fjalës së tij meta shprehu shqetësimin që një biznesmen i kishte ngritur pak dit më parë, ku i kishte thënë se shumë turistë janë tërhequr për të ardhur dhe për të vizituar vendin tonë për shkak të klimës politike në vend.

“Dje takova një drejtues të një agjencie turistike dhe me shumë shqetësim më thotë: Çfarë po ndodh kështu? Kisha 7 grupe turistike nga Spanja që kishin bërë rezervimet për të ardhur për sezonin turistik. Gjashtë grupe i kanë anuluar deri tani rezervimet. Ky është një shqetësim real që ka të bëjë me perspektivën e një sektori me të cilin jetojnë mijëra e mijëra familje shqiptare në të gjithë vendin, në bregdet apo edhe në mal”, - u shpreh Meta.

Ai tha gjithashtu se ko është e dëmshme dhe për klimën e biznesit dhe në rast se politika do të vijojë krizën, jo vetëm nuk do të ketë më investitorë të huaj q do të vijnë në Shqipëri, por rrezikojnë të largohen edhe këta që janë.

“Ky është një shqetësim serioz, sepse nuk ka të bëjë vetëm me turizmin, ka të bëjë me investimet. Kur një turist frenohet për të ardhur në Shqipëri për shkak të një lajmi që sjell pasiguri për të kaluar disa ditë pushime, si mund të vijë një investitor i huaj të marrë kredi dhe të bëjë investime në Shqipëri. Të gjitha këto janë kosto që i paguajnë familjet shqiptare”, përfundoi Meta.