Partia Demokratike denoncoi sot ndryshimet që po bën qeveria në Buxhetin e vitit 2023 duke rritur shpenzimet operative të qeverisjes me 100 milionë euro më shumë për fasadat dhe luksin e vet në dëm të investimeve për qytetarët në arsim, strehim, shëndetësi, mbrojtje sociale etj.

Z. Dorian Teliti, në një deklaratë nga selia e PD, tha:

"Sot anëtarët e mazhorancës në Komisionin e Ekonomisë dhe Financave në Kuvend, me karton dhe pa transparencë,  miratuan Aktin Normativ për ndryshimet e buxhetit të vitit aktual 2023.

Qeveria krenohet se janë rritur të ardhurat totale, gjë që ndodh sepse janë rritur të ardhurat nga sigurimet shoqërore dhe shëndetësore, barrë që rëndon e tëra në kurrizin e sipërmarrësve vendas - por ajo nuk thotë se pse kanë rënë me 70 milionë euro të ardhurat që vijnë nga Tatimet dhe Doganat.

Qeveria edhe sot nuk dha asnjë shpjegim konkret se përse, ndonëse çmimet vazhdojnë të rriten dita-ditës dhe sidomos çmimet e shportës së ushqimeve, qeveria nuk ndërmerr asnjë paketë mbështetëse për shtresat e prekura dhe bizneset që janë në prag të falimentit.

Nga ana tjetër, qeveria nuk ngurron, me një të rënë të lapsit, të rrisë shpenzimet operative të qeverisjes së përgjithshme me 100 milionë euro më shumë - që do të vazhdojnë edhe më fort të financojnë shpenzimet për fasada dhe luksin qeveritar.

Vitet kalojnë, por standardet e transparencës të menaxhimit të fondeve buxhetore nuk përmirësohen.

Ndonëse ligji organik i buxhetit parashikon detyrimin e zbardhjes së listës së investimeve publike të cilat preken nga rialokimet e fondeve, në këtë Akt Normativ qeveria nuk e bën publike se cilave projekte konkretisht do t’u ulet financimi vjetor i parashikuar.

Ndonëse rriten shpenzimet operative të qeverisë, sot kartonët miratuan shkurtimet e fondeve të investimeve për disa programe shumë të rëndësishme.

Konkretisht, shkurtohen me pothuajse 9 milionë euro investimet në strehim.

Shkurtohen me 8.5 milionë euro investimet në arsim, me pak fjalë do kemi më pak shkolla të ndërtuara.

Shkurtohen me 7 milionë euro investimet në shëndetësi dhe përkujdesin social.

Shkurtohen me pothuajse 2 milionë euro investimet në emergjencat civile.

Dhe qershia mbi tortë, shkurtojnë investimet në strehim, arsim dhe shëndetësi, ama nuk ngurojnë të rrisin me 2 milionë euro investimet në godinat qeveritare.

Këto të dashur qytetarë janë të vërtetat e aktit normativ të  buxhetit të vitit aktual 2023.

Ditët në vijim do të fillojë diskutimi i projektbuxhetit dhe paketës fiskale për vitin e ardhshëm 2024.

I bëjmë thirrje qeverisë që të prezantojë një paketë fiskale që ul barrën tatimore ndaj bizneseve dhe qytetarëve, një paketë fiskale që ndihmon në zhvillimin gjithëpërfshirës të ekonomisë tonë.

Gjithashtu i bëjmë thirrje qeverise që në projektbuxhetin e vitit 2024 të ulë fondet e shpenzimeve operative të panevojshme, të eliminojë financimin e PPP-ve më mbështetje buxhetore, të rrisë investimet në sektorët jetike të shoqërisë tonë dhe të mbështëse fuqimisht shtresat vulnerabël."