Abuzimi me asetet shtetërore në Shqipëri ka arritur nivele skandaloze, pasi çarteri i shtetit përdoret nga kryeministri Edi Rama për të shëtitur botën ai dhe familja e tij.

Ndërsa në rastin e vetëm ku është dashur angazhimi i të gjithë shtetit, sipas protokollit, për të sjellë trupin e ish-presidentit të Republikës, Bujar Nishani, avioni shtetëror nuk vihet në dispozicion.

Pse? Sepse avioni ishte i zënë me kryeministrin dhe familjen e tij.

Arkëmorti me trupin e pajetë të Nishanit ka ardhur nga Gjermania me furgon në rrugë tokësore nga Berlini duke përshkuar një rrugë disa mijëra kilometra përmes Austrisë, Hungarisë, Serbisë për të mbërritur në Prishtinë dhe nga aty përmes Rrugës së Kombit, në Tiranë, në orët e para të mëngjesit të 31 majit. 

Në pikën e kalimit kufitar, makina e funeralit është pritur me nderime nga policia e Kosovës. Foto që shihni i përket pikërisht momentit të mbërritjes së arkëmortit në doganën e Morinës.  

Ish-Presidenti i Republikës meritonte të nderohej me nderimet më të larta shtetërore, por autoritetet kanë vendosur t'i veshin vetes një nga turpet më të paimagjinueshme.  

Shpenzohen miliona euro për inceneratorët dhe koncesionet PPP në radhë, por kursehen disa mijë euro për avionin shtetëror që do të sillte në atdhe trupin e pajetë të atij që ka shërbyer si kryetar i shtetit për 5 vite, 2012-2017.  

Edi Rama, me Lindën dhe Zahon fluturoi me avionin shtetëror ditën e shtunë drejt Parisit për të parë në stadium finalen e Champions League, por nuk e ka parë aspak të udhës që çarterin që paguhet nga taksat e qytetarëve shqiptarë, ta vendosë në dispozicion të protokollit të shtetit, që po organizonte ceremoninë e funeralit, për ish-presidentin Bujar Nishani.