SYRI TV

Tashmë është pothuajse zyrtare: Edi Rama i ka bërë dalje Dritan Lelit, kryebashkiakut të Vlorës, të cilin e promovoi vetë. Pas debateve me tone të ashpra të pak kohëve më parë, ku kryeministri e akuzoi Dritan Lelin se i kishte ulur reputacionin në Vlorë, drejtuesi i bashkisë së këtij qyteti po lihet në hije edhe në daljet publike.

Këtë fillim jave, Damian Gjiknuri, deputet i qarkut të Vlorës, u shfaq krah Afrim Qëndros, ish-drejtorit të Autoritetit Rrugor Shqiptar, i akuzuar për skandalin e Unazës së Re në Tiranë.

Të dy, Gjiknuri si deputet dhe Qëndro si nënkryetar i bashkisë së Vlorës, inauguruan asfaltimin e rrugës së Pyllit të Sodës. Por, ajo që u vu re, ishte fakti se në këtë inaugurim mungonte pikërisht Dritan Leli, kryebashkiaku i Vlorës, që tashmë duket se do të jetë thjesht formalisht në këtë post.

Madje, këtë la të kuptohet dhe Damian Gjiknuri gjatë prononcimit për mediat, duke mos i kursyer elozhet për Afrim Qendron.

Madje, Gjiknuri nuk i kurseu as shigjetat për Dritan Lelin, duke u shprehur se u desh vizita e Ramës në këtë zonë, që të ndërtohej rruga.

Ndërsa vetë Qendro, tregoi gjithashtu se po merr frenat e Bashkisë, duke folur sikur të ishte kryetar i saj, pra, sipas tij, do të flasë më shumë me punë se sa me fjalë.