Një shqiptar rreth të njëzetave rrezikon 36 muaj burg për trafikimin e 21,5 kilogramëve kanabis në Belgjikë. Sipas avokatit të tij, i riu e kishte kryer transportin për shkak të vështirësive financiare.

Nga Wouter Hertogs, HLN

Personi 25-vjeçar kishte mbërritur më 30 shtator me një fluturim nga kryeqyteti tajlandez, Bangkoku.

Gjatë kontrollit të valixhes së tij, dogana belge gjeti 21,5 kilogramë kanabis, pas së cilës ai u privua menjëherë nga liria.

“Zotëria i pranoi menjëherë faktet dhe deklaroi se ndodhej në vështirësi financiare”, tha prokuroria. “Atij i ishin premtuar 5 000 euro për kryerjen e këtij transporti. Kërkoj një dënim me burg prej 36 muajsh”.

Avokati i të riut kërkoi njëfarë mëshire:

“Ai kishte ushtruar për disa vite një aktivitet të pavarur në Shqipëri dhe për këtë kishte marrë një kredi. Por u detyrua ta mbyllte biznesin për një periudhë dhe përfundoi në vështirësi financiare. Për këtë arsye pranoi ofertën. Ai u rrëfye menjëherë dhe në telefonin e tij celular u gjetën indicie që çojnë te porositësi. Kërkojmë që një pjesë e dënimit të shqiptohet me pezullim”.