E dyshuar si shkaktarja e vrasjes së Martin Çeço, Martina Pajollari ka rrëfyer variantin e parë të dëshmisë që ajo ka dhënë në polici, pasi trupi i 26 vjeçarit u gjet i hedhur në rezervuarin e Kolanecit në Maliq në qershor 2022.
Në emisionin Uniko nga Spartak Koka, Tina Pajollari tregon se sipas variantit të saj të parë në polici, i interesuar për të vrarë Martin Çeçon ka qenë Valter Mollaj. Kjo, sipas saj, sepse Valteri bëhej xheloz që Tina fliste me Martinin.
Pas dëshmisë së parë të Tinës, u arrestuan dhe mbahen ende në qeli Valter Mollaj, Edlir Mollaj dhe çobani i dy kushërinjve, Bledi Angjo
Gjithmonë sipas këtij varianti, Valter Mollaj kishte lidhje dashurie jashtëmartesore me 18-vjeçaren Tina Pajollari, të dy banues në të njëjtin fshat.
Por këtë variant të parë të dëshmisë së saj, Tina Pajollari thotë sot se nuk e mbështet më. Ajo tregon se ka gënjyer dhe asgjë nuk është e vërtetë. Këto deklarime të para në polici i bëri sepse kishte frikë, thotë Tina Pajollari.
Pyetje: Tre herët e fundit i ke qëndruar versionit që ke marrë pjesë në krim apo nuk ke marrë pjesë në krim?
Tina Pajollari: Jo kam thënë.
Pyetje: Çfarë ke deklaruar herën e fundit që e ke pranuar krimin? Ke thënë që ke qenë dhe ti në Kolanec?
Tina Pajollari: Po.
Pyetje: Si e ke thënë? A mund të na e rrëfesh?
Tina Pajollari: Thashë që isha dhe unë me ata, unë qëndrova në makinë.
Pyetje: Si e ke përshkruar? Kush ishte ideatori që do ta vriste? Si e ke përshkruar ti ngjarjen?
Tina Pajollari: Ishte Valter Mollaj, thashë unë, ishte Edlir Mollaj. Ishte makina e Valter Mollajt, ishte dhe çobani. Shkuan të tre, unë qëndrova në makinë. Nuk zbrita.
Pyetje: Sipas këtij versioni kush ishte i interesuar ta vriste?
Tina Pajollari: Valter Mollaj!
Pyetje: Përse?
Tina Pajollari: Sepse bëhej xheloz që unë flisja me Martinin dhe ai bëhej xheloz për mua.
Pyetje: Kështu e ke thënë?
Tina Pajollari: Po!
Pyetje: Duke kundërshtuar këtë version që ke thënë, a ke frikë se ka prova në telefonin tënd që tregojnë të kundërtën e asaj që po na thua tani. Se tani po na thua që nuk ke folur kurrë në telefon me Martinin. Dhe po na thua që nuk i ke kthyer kurrë përgjigje Martinit. A ke frikë se nga telefoni i Martinit apo i joti të zbulohet që ke folur me Martinin?
Tina Pajollari: Jo.
Pyetje: Je e sigurt?
Tina Pajollari: Po, shumë e sigurt!
Pyetje: Po sikur të dalë që ke folur, çfarë do thuash?
Tina Pajollari: Jo, nuk kam folur. Jam shumë e sigurt që nuk kam folur.
Pyetje: Do t’i qëndrosh këtij versioni apo do kesh një version tjetër të tretë?
Tina Pajollari: Jo, do t’i qëndroj këtij versioni.
Pyetje: Se kjo është e vërteta apo se kjo të intereson?
Tina Pajollari: Po, kjo është e vërteta.
© SYRI.net