Milani kërkon përforcime në mbrojtje, ëndrra është Van Dijk, në krye të listës Gonçalo Inácio

Merkatoja verore ka ndezur imagjinatën te Milani, i cili pas një sezoni zhgënjyes po synon të rindërtojë skuadrën me emra të mëdhenj. Pas afrimit të Gonçalo Ramos, transferimi më i shtrenjtë në historinë e klubit, kuqezinjtë nuk ndalen dhe tani fokusi është zhvendosur te mbrojtja.

Trajneri Ruben Amorim, i sapoemëruar në krye të Milanit, ka kërkuar përforcime cilësore në prapavijë dhe ka marrë miratimin e plotë për dy emra portugezë: Antonio Silva dhe Gonçalo Inácio.

Antonio Silva – pengesat nga Benfica

Mbrojtësi i Benfica-s është një nga opsionet kryesore, por operacioni duket i komplikuar. Klubi portugez nuk dëshiron ta shesë lojtarin e lindur në vitin 2003 dhe madje i ka ofruar një rinovim kontrate me rol të rëndësishëm në projektin e ri. Megjithatë, sipas mediave portugeze, lojtari ende nuk është i bindur plotësisht për të ardhmen e tij në Lisbonë.

Gonçalo Inácio – opsioni në avantazh

Në këto kushte, në krye të listës ka dalë Gonçalo Inácio. Mbrojtësi 24-vjeçar i Sportingut të Lisbonës është një “i preferuar” i Amorim, i cili e ka stërvitur më parë dhe e konsideron një element kyç për sistemin e tij taktik. Për ta sjellë në Milano, megjithatë, do të nevojitet një ofertë e rëndësishme, pasi klauzola e tij e largimit arrin në 60 milionë euro, ndonëse një shifër prej 45–50 milionësh mund të mjaftojë për të bindur klubin portugez.

Në listën alternative të Milanit për mbrojtjen figurojnë edhe Lisandro Martínez i Manchester United dhe Tiago Gabriel, i cili spikati sezonin e fundit me Lecce-n.

Ëndrra e madhe: Virgil Van Dijk

Megjithatë, në krye të ëndrrave milaniste qëndron një emër i madh: Virgil Van Dijk. Mbrojtësi holandez i Liverpool-it konsiderohet objektivi më i vështirë, pothuajse i paarritshëm. Sipas raportimeve, ideja e transferimit të tij është propozuar nga Zlatan Ibrahimovic dhe ka mbërritur deri në tryezën e drejtuesit të klubit, Gerry Cardinale.

Van Dijk ka edhe një vit kontratë me Liverpool-in dhe do të ishte lideri ideal për të ndërtuar repartin e ri defensiv të Milanit. Edhe pse lojtari thuhet se është i hapur ndaj një transferimi në Milano, klubi anglez nuk ka ndërmend të heqë dorë lehtë prej tij, sidomos pas largimeve të mundshme të disa liderëve të tjerë të skuadrës.

Milani, ndërkohë, vazhdon të ëndërrojë, por edhe të punojë intensivisht për të sjellë një emër të madh në mbrojtje që të kompletojë projektin e ri të Ruben Amorim.