Qeveria finlandeze thotë se njerëzit po presin përtej kufirit në Rusi që kufiri të rihapet, kështu që ata do të të përpiqen të kalojnë.

Finlanda po e zgjat mbylljen e kufirit të saj lindor me Rusinë edhe për një muaj tjetër, sepse dyshon se Moska po përpiqet të minojë sigurinë e vendit nordik duke dërguar emigrantë pa dokumente përtej kufirit.

Ministrja e Brendshme Mari Rantanen, nga Partia e ekstremit të djathtë finlandez, e bëri njoftimin në një konferencë shtypi në Helsinki të enjten pasdite.

Finlanda e mbylli kufirin në fund të vitit të kaluar pasi 1300 emigrantë pa dokumentacion apo vizat e duhura kishin hyrë që nga shtatori - një numër jashtëzakonisht i lartë, vetëm disa muaj pasi Finlanda u bashkua me NATO-n.

Finlanda akuzoi Rusinë se po synonte të çonte emigrantët në kufirin e saj të kontrolluar mirë. Kremlini i mohoi akuzat dhe tha se i vinte keq për mbylljen e kufirit finlandez.

Mbyllja e fundit do të zgjasë deri më 11 shkurt.

"Ka njerëz në zonat afër që presin hapjen e kufirit," u tha Rantanen gazetarëve.

Emigrantët që mbërritën në muajt e fundit të vitit të kaluar ishin kryesisht nga Lindja e Mesme dhe Afrika - veçanërisht nga Siria, Somalia dhe Jemeni - dhe shumica dërrmuese e tyre kanë kërkuar azil në Finlandë.

Ata aktualisht po mbahen në qendrat e pritjes së emigrantëve në pjesë të ndryshme të vendit, ndërsa presin një vendim nga autoritetet.

Shumë njerëz në Finlandë i kanë karakterizuar veprimet e supozuara të Moskës si hakmarrje për anëtarësimin e vendit nordik në NATO në prill të vitit të kaluar, por ekspertët finlandezë të sigurisë kanë thënë se motivi kryesor i Rusisë për manovra të tilla emigrantësh mbetet i paqartë.

Qeveria e kryeministrit Petteri Orpo fillimisht zgjodhi mbylljen e kufirit prej 1,340 kilometrash në nëntor, duke përmendur shqetësimet e sigurisë dhe "luftën hibride" të Rusisë. Më vonë, ajo hapi dy pika kontrolli të përzgjedhura në Finlandën lindore dhe veriore në baza prove, por fluksi i emigrantëve vazhdoi.

Të tetë pikat e kalimit kufitar Finlandë-Rusi për pasagjerët janë mbyllur që nga 15 dhjetori. Pika e kontrollit hekurudhor juglindor për trenat e mallrave në Vainikkala mbetet e hapur për momentin.

Finlanda, një komb me 5.6 milionë banorë, vepron si kufiri i jashtëm i Bashkimit Evropian në veri dhe përbën një pjesë të konsiderueshme të krahut verilindor të NATO-s./ar.sh/SYRI.NET