Pas luftës së paprovokuar në Ukrainë, Rusia kërcënon tani edhe Armeninë. Vendi që ka pasur tradicionalisht lidhje të ngushta me Rusinë, ka sinjalizuar shkëputje nga aleati i vjetër duke u hapur ndaj një bashkëpunimi më të madh me aleancën e NATO-s. Kjo nuk i ka pëlqyer Moskës, me Lavorv që paralajmëron se Armenia duhet të jetë e ndërgjegjshme mbi rrezikun e humbjes së sovranitetit në mbrojtje dhe siguri kombëtare, mes dialogut të thelluar me NATO-n.

Në një intervistë për median ruse, Tass, shefi i diplomacisë së Kremlinit theksoi se gjatë këtij viti, Armenia kishte marrë pjesë në një sërë aktivitetesh me aleancën. Sipas tij, vijon të modernizojë forcat e armatosura në përputhje me standartet e NATO-s dhe zhvillon trajnime në shtete të ndryshme të bllokut.

“Ne jemi të shqetësuar lidhur me këtë. U kemi tërhequr vëmendjen homologëve tanë Armenë se qëllimi aktual i NATO është fuqizimi i pozicionit në rajon dhe krijimi i kushteve për manipulim me skemën, “përça dhe sundo”, tha ministri i Jashtëm, Sergey Lavrov.

Lavrov vijon më tej duke akuzuar perëndimin se po mbjell kaos nëpër botë, duke kënaqur nevojat e veta në kurriz të të tjerëve. Fjalët e tij vijnë teksa vende si Rusia, Kina dhe India po flasin gjithnjë e më shumë mbi nevojën e një modeli që do të riformësonte politikën globale në mënyrë më të drejtë dhe të pranueshme.

“Bota mbetet në gjendje turbulente. Dhe një prej arsyeve për këtë është klasa sunduese në perëndim, e cila po provokon kriza mijëra kilometra larg kufjeve të vet në mënyrë që të arrijë qëllimet e veta në kurriz të shteteve të tjera”, shtoi ai.

Në intervistën e tij, Lavrov fajësoi gjithashtu perëndimin për nxitjen e konfliktit Rusi-Ukrainë përmes zgjerimit të NATO-s dhe duke e shndërruar Ukrainën në një mburojë anti-ruse. Për ministrin e jashtëm rus, perëndimi ka përgjegjësi edhe për përshkallëzimin e konfliktit mes Izraelit dhe Palestinës.