Futbolli italian është në zi pas ndarjes nga jeta të ish-sulmuesit të njohur Igor Protti. Ish-futbollisti, i cili gjatë karrierës së tij veshi fanellat e disa klubeve të rëndësishme italiane, mes tyre Bari dhe Livorno, u shua në moshën 58-vjeçare pas një beteje të gjatë me kancerin e zorrës së trashë.

Lajmi u bë i ditur nga familja e tij përmes një mesazhi prekës të publikuar në rrjetet sociale, ku u nda edhe përshëndetja e fundit që Protti kishte lënë sipas dëshirës së tij.

“Ky udhëtim i mrekullueshëm, si çdo ndeshje, ka arritur te vërshëllima përfundimtare. E vetmja gjë që mund të bëj është të falënderoj familjen time të mrekullueshme që e kam dashur pafundësisht. Falënderoj të gjithë njerëzit që më kanë dashur dhe që kanë qenë pranë meje, si dhe tifozët e të gjitha skuadrave ku kam luajtur për dashurinë dhe respektin që më kanë treguar gjithmonë. Shpresoj që të jetë një mirupafshim dhe jo një lamtumirë”, shkruhej në mesazhin e tij.

Kohët e fundit, Protti kishte folur hapur për sëmundjen, duke e krahasuar atë me një ndeshje që “nis me rezultatin 3-0 kundër”, por që duhet luftuar me të njëjtën vendosmëri që ai kishte treguar gjatë karrierës në fushën e lojës.

Dalja e tij e fundit publike ishte në fund të muajit maj, kur mori pjesë në ceremoninë e martesës së vajzës së tij, Noemi.

Igor Protti do të kujtohet si një nga sulmuesit më të dashur të futbollit italian, jo vetëm për golat dhe kontributin e tij në fushë, por edhe për karakterin, përulësinë dhe forcën me të cilën përballoi sfidën më të vështirë të jetës së tij. Vdekja e tij ka prekur thellë botën e futbollit dhe tifozët që e mbështetën gjatë gjithë karrierës.