Ish-trajneri i njohur italian, Fabio Capello, ka shprehur shqetësime të forta lidhur me emërimin e Rúben Amorim-it në krye të Milanit, duke e cilësuar këtë zgjedhje si një vendim të rrezikshëm si për klubin ashtu edhe për vetë trajnerin.

Në një intervistë për “Gazzetta dello Sport”, Capello nuk ka kursyer kritikat, duke theksuar se situata aktuale te Milani duket e paqartë dhe e mbushur me konfuzion në zgjedhjet strategjike.

“Milani i Amorim-it? Është një hap në boshllëk, si për të ashtu edhe për kuqezinjtë”, është shprehur ai, duke nënvizuar se portugezi vjen nga një eksperiencë e vështirë në futbollin anglez dhe ende nuk ka provuar veten në Serie A.

Sipas Capellos, ndryshimet e shumta në emra dhe profile trajnerësh tregojnë mungesë stabiliteti në projektin e klubit: “Kam dëgjuar shumë emra të ndryshëm, dhe kjo tregon konfuzion”.

Ai ka analizuar edhe karrierën e Amorim-it, duke e krahasuar suksesin e tij te Sportingu me vështirësitë që ka hasur te Manchester United, duke theksuar se përshtatja në një ambient si Milani nuk do të jetë e lehtë.

“Te United nuk arriti të ndikonte te lojtarët, ndërsa te Milani duhet ta bëjë patjetër. Është një klub me histori të madhe që kërkon respekt dhe përgjegjësi”, shtoi Capello.

Ai paralajmëron se problemi kryesor është mungesa e njohjes së kampionatit italian nga Amorim, ndërsa Milani, sipas tij, po hyn në një fazë me shumë pasiguri dhe rrezik.

Në përfundim, Capello e përshkruan këtë lëvizje si një “eksperiment të rrezikshëm”, ku të dyja palët mund të përballen me vështirësi serioze në sezonin e ardhshëm.