Futbollisti spanjoll Rafa Mir është dënuar me tetë vjet e gjysmë burg nga Gjykata Provinciale e Valencias, pasi u shpall fajtor për agresion seksual dhe plagosje.

Vendimi i gjykatës lidhet me një ngjarje të ndodhur në orët e para të 1 shtatorit 2024, kur Mir ishte lojtar i Valencias. Sipas gjykatës, nuk ka pasur asnjë formë pëlqimi nga ana e viktimës gjatë aktit për të cilin futbollisti u akuzua.

Procesi gjyqësor u zhvillua më 28 maj 2026. Prokuroria kishte kërkuar një dënim prej 10 vjetësh e gjysmë burg. Mir ishte arrestuar në shtator të vitit 2024 pas denoncimit të bërë nga një grua, e cila kishte deklaruar se e kishte njohur futbollistin në një klub nate dhe më pas ishte drejtuar në banesën e tij së bashku me një shoqe dhe një mik të lojtarit.

Në arsyetimin e saj, gjykata vlerësoi se dëshmia e denoncueses ishte e besueshme dhe përmbushte kushtet ligjore për të rrëzuar prezumimin e pafajësisë. Përveç dënimit me burg, Mir është urdhëruar të paguajë 64 mijë euro dëmshpërblim për viktimën.

Gjatë gjyqit, futbollisti kishte mohuar akuzat, duke deklaruar se gjithçka kishte ndodhur me pëlqimin e të dy palëve. Ai kishte treguar se mbeti i shokuar kur u arrestua, pasi mendonte se autoritetet po e thërrisnin për një incident tjetër të ndodhur atë natë.

Ndërkohë, edhe shoku i tij, futbollisti Pablo Jara, i cili ishte i pranishëm gjatë ngjarjes dhe u gjykua në të njëjtin proces, është dënuar me dy vjet e gjysmë burg për agresion seksual, si dhe me një gjobë prej 6,280 eurosh.

Vendimi ndaj Rafa Mir nuk është ende përfundimtar dhe mund të ankimohet në instancat më të larta gjyqësore.