Warren Zaïre-Emery, talent i ri i Paris Saint-Germain dhe Francës, është përballur me një situatë të pazakontë gjatë përgatitjeve për Kupën e Botës 2026 në Shtetet e Bashkuara.

Mesfushorit francez iu refuzua hyrja në zonën e barit të hotelit në Boston, ku kombëtarja franceze ka bazën e saj gjatë turneut. Arsyeja është mosha e tij: Zaïre-Emery është vetëm 20 vjeç dhe sipas ligjeve të shtetit të Massachusetts, personat nën 21 vjeç nuk lejohen të qëndrojnë në ambiente ku shiten kryesisht pije alkoolike.

Rregulli zbatohet edhe nëse të rinjtë shoqërohen nga persona të tjerë. Në këtë shtet amerikan, kushdo që blen alkool për një person nën 21 vjeç mund të përballet me dënim deri në një vit burg dhe gjobë prej 2 mijë dollarësh.

Stafi i Francës po kërkon një zgjidhje për të mos e izoluar talentin e PSG-së nga shokët e skuadrës, pasi lojtarët e tjerë mbi moshën 21 vjeç mund të hyjnë në atë hapësirë. Një mundësi që po shqyrtohet është fakti se bari ndodhet pranë restorantit të hotelit, çka mund të krijojë një përjashtim praktik.

Problemi nuk prek vetëm Zaïre-Emery, por edhe lojtarë të tjerë nën 21 vjeç nga kombëtaret pjesëmarrëse në Botërorin 2026. Massachusetts nuk është i vetmi shtet me rregulla të tilla: në Teksas gjoba për raste të ngjashme mund të arrijë deri në 4 mijë dollarë, ndërsa masa kufizuese ekzistojnë edhe në Kaliforni, Nju Xhersi dhe Florida.

Ndërkohë, në dy vendet e tjera organizatore të turneut, Kanada dhe Meksikë, kufiri ligjor për konsumimin e alkoolit është 18 vjeç, duke krijuar një situatë të ndryshme për lojtarët e rinj gjatë Botërorit.