Mallorca ka vendosur të vazhdojë projektin me Martín Demichelis edhe pas rënies nga La Liga. Klubi spanjoll ka zyrtarizuar rinovimin e kontratës së trajnerit argjentinas deri në vitin 2028, duke i besuar atij rikthimin e menjëhershëm në elitën e futbollit spanjoll.

Demichelis mori drejtimin e skuadrës më 22 shkurt me objektivin për të siguruar mbijetesën. Edhe pse Mallorca nuk arriti të shmangte rënien, drejtuesit mbetën të kënaqur me punën e tij dhe me përmirësimin e dukshëm të ekipit në muajt e fundit të sezonit.

Nën drejtimin e trajnerit argjentinas, Mallorca grumbulloi 18 pikë në 12 ndeshje, statistikë shumë pozitive që, megjithatë, nuk mjaftoi për të qëndruar në LaLiga. Skuadra e mbylli kampionatin me 42 pikë, po aq sa Osasuna dhe Levante, por mbeti viktima e madhe e barazimeve në klasifikim.

Pas rënies nga kategoria, tifozët kërkuan vazhdimësinë e Demichelis dhe klubi vendosi të mos ndryshojë kurs. Argjentinasi kishte shprehur publikisht dëshirën për të qëndruar në Ishull dhe tani do të ketë mundësinë të ndërtojë një projekt të ri në Segunda Division.

Demichelis fitoi shpejt respektin e tifozëve falë stilit ofensiv dhe guximtar të lojës. Ai ndryshoi identitetin taktik të skuadrës me një skemë në formë rombi, duke rikthyer në formë disa lojtarë dhe duke u dhënë më shumë hapësirë talentëve si Pablo Torre.

Në javët e fundit të sezonit, Mallorca u penalizua nga dëmtimet dhe mungesa e alternativave në skuadër, duke u detyruar të aktivizojë edhe lojtarë nga akademia. Shumë tifozë vazhdojnë të fajësojnë drejtuesit për merkaton e dobët, ndërsa Demichelis konsiderohet si figura që arriti të rikthejë shpirtin dhe besimin në dhomat e zhveshjes.

Megjithatë, mbetet për t’u parë nëse trajneri argjentinas do të arrijë të përballojë presionin dhe vështirësinë e Segunda Division, një kampionat shumë kërkues ku objektivi i vetëm i Mallorca-s do të jetë rikthimi në La Liga.