Arsenali vazhdon marshimin drejt titullit në Premier League, duke u shkëputur me gjashtë pikë nga Manchester City pas fitores ndaj Fulhamit. Megjithatë, City ka ende dy ndeshje më shumë për të luajtur, çka e mban të hapur garën.

Pas ndeshjes, trajneri Mikel Arteta u shfaq i kënaqur me paraqitjen e skuadrës së tij. “Jam jashtëzakonisht i lumtur. Ishte një ndeshje e vështirë, sidomos pas kthimit të vonë nga Madridi. Skuadra dha maksimumin dhe reagoi në mënyrën e duhur”, deklaroi ai.

Arteta theksoi se Arsenali dominoi në fushë dhe tregoi karakterin e duhur: “Luajtëm në mënyrë të jashtëzakonshme. Treguam grintën për të cilën kishim folur para ndeshjes. Kemi mundësinë të fitojmë dy kompeticione të rëndësishme dhe jemi shumë pranë arritjes së këtij objektivi”.

Tekniku spanjoll vlerësoi edhe mbështetjen e tifozëve, duke theksuar rëndësinë e lidhjes mes skuadrës dhe publikut: “Kjo është pikërisht ajo që na duhet. Kur krijohet kjo sinergji, bëhemi një kundërshtar shumë i vështirë për t’u mposhtur”.

Në veçanti, Arteta u ndal te paraqitja e Bukayo Saka, për të cilin tha se po bën hapa përpara, por duhet menaxhuar me kujdes. Ai vlerësoi edhe talentin e ri Myles Lewis-Skelly, duke e cilësuar si një lojtar me potencial të jashtëzakonshëm dhe me aftësi për të luajtur në disa pozicione.

Me këtë fitore dhe deklaratat e trajnerit, Arsenali dërgon një mesazh të fortë për rivalët, duke rritur presionin ndaj Manchester City-t në fazën vendimtare të sezonit.