Douglas Luiz është gati të mbyllë përfundimisht eksperiencën e tij te Nottingham Forest dhe të rikthehet në Premier League, këtë herë te Aston Villa. Lajmi është konfirmuar nga Fabrizio Romano, i cili ka bërë të ditur se mes Juventusit dhe klubit anglez është arritur një marrëveshje verbale për mesfushorin brazilian.

Sipas informacioneve, Douglas Luiz do të transferohet te Aston Villa me formulën e huazimit me pagesë, e shoqëruar me një opsion blerjeje që pritet të variojë mes 20 dhe 25 milionë eurove. Një shifër që pasqyron vlerën e lojtarit dhe besimin e Villans për ta rikthyer atë në një ambient që ai e njeh shumë mirë, pasi ka qenë një nga shtyllat e mesfushës së klubit në sezonet e mëparshme.

Operacioni është bërë i mundur falë një “zinxhiri” merkatoje. Nottingham Forest kishte vendosur të ndërpresë huazimin e Douglas Luiz, duke hapur rrugën për largimin e tij. Kjo situatë është shfrytëzuar nga Juventusi, që zotëron kartonin, dhe Aston Villa për të gjetur një zgjidhje të shpejtë, që i kënaq të gjitha palët e përfshira.

Te Juventus, mesfushori nuk arriti të bëhej një pikë fikse, ndërsa drejtuesit bardhezinj, në bashkëpunim me trajnerin Luciano Spalletti, kanë vendosur të ristrukturojnë repartin e mesfushës, duke krijuar hapësirë për lëvizje të tjera në këtë merkato dimërore.

Mbeten për t’u sqaruar vetëm disa detaje formale dhe burokratike, por marrëveshja konsiderohet e mbyllur. Douglas Luiz pritet të udhëtojë drejt Birminghamit në ditët në vijim për të nisur zyrtarisht një kapitull të ri në Premier League, aty ku ka lënë gjurmë dhe ku synon të rikthehet protagonist.