Gonzalo Garsia, autor i një tregolëshi në fitoren e Real Madridit të dielën kundër Real Betis (5-1), tha se ai nuk ndjente përgjegjësi të shtuar për faktin e zëvendësimit të francezit Kilian Mbape, të cilin ai e konsideron si lojtarin më të mirë në botë.

“Mbape është lojtari më i mirë në botë. Na jep shumë me të gjitha golat e tij, por nuk kishte asnjë përgjegjësi. Shokët e mi të skuadrës dhe trajneri më japin besim. Unë përpiqem të bëj më të mirën time”, tha ai para gazetarëve.

Gonzalo e konsideroi “të pamundur” të veçonte një nga tre golat e tij – një me këmbën e djathtë, një tjetër me të majtën dhe një tjetër me kokë.

“Mjaft i lumtur. Është një mënyrë e shkëlqyer për të filluar vitin. Tre gola shumë të veçantë, dhe në “Bernabéu” është edhe më e veçantë”, tha ai.

Në fund edhe një fakt interesant, pasi edhe dy golat e tjerë u shënuan nga lojtarë të ardhur nga akademia e Realit.

“Një rastësi mjaft e bukur. Nuk e di nëse kishte ndodhur më parë dhe është një mesazh i shkëlqyeshëm për pjesën tjetër të akademisë”, ka vazhduar Gonzalo.

Tre golat nuk e bëjnë atë të mendojë nëse ai meriton më shumë mundësi, në një sezon në të cilin ai kishte vetëm 330 minuta.

“Unë nuk mendoj për këtë. Ky është Real Madridi dhe përballë meje kam lojtarët më të mirë në botë, fokusohem vetëm te vetja dhe duke përfituar nga mundësitë që më jep trajneri”, ka përfunduar ai.