Në epokën e të dhënave, edhe futbolli nuk u shpëton statistikave. Superkompjuteri i Opta-s ka përpunuar mijëra skenarë për të parashikuar fituesin e Kupës së Botës 2026 dhe verdikti surprizues vendos Spanjën në krye të listës me 17% mundësi për të fituar, duke e bërë kampionen e Europës favorite absolute.

Pas Spanjës renditet Franca, finalistja e Katarit, me 14.1% shanse. Nëse do të arrijnë sërish në finale, ‘Les Bleus’ do të bëheshin të tretët histori që shkojnë tri herë radhazi në finale, pas Gjermanisë (1982-1990) dhe Brazilit (1994-2002).

Anglia zë vendin e tretë me 11.8% shanse. Problem i saj nuk është statistikor, por emocional: anglezët nuk kanë arritur në finale që nga viti 1966.

Argjentina, kampionja aktuale nga viti 2022, ka vetëm 8.7% mundësi për të mbrojtur titullin, por mbetet kombësia joeuropiane me shanset më të mëdha.

Një surprizë tjetër është Portugalia, e cila shfaqet me 6.6% mundësi dhe është ekipi me më shumë shanse që nuk ka fituar kurrë një Botëror.

Sa u përket vendeve pritëse, Shtetet e Bashkuara, Kanadaja dhe Meksika, vetëm kjo e fundit ka pak shpresë, me 1.3% mundësi, ndërsa Maroku, përfaqësuesja afrikane më e mirë, renditet me 1.1%, duke u bazuar në suksesin historik të vitit 2022, kur u rendit i katërti.

Ndërkohë, surpriza më e madhe për shumë tifozë është mungesa e Brazilit të drejtuar nga Carlo Ancelotti në ‘top-5’ të favoritëve. Algoritmi tregon se dominimi europian vazhdon të kontrollojë skenën e futbollit modern.

Në përfundim, nëse statistikat e superkompjuterit do të përputhen me realitetin, Spanja duhet të fillojë të planifikojë hapësirën për trofeun në muzeun e saj, ndërsa futbolli i vërtetë do të tregojë nëse shanset e parashikuara do të realizohen apo do të përballen me surprizat e papritura.