Hamburger SV mori pikën e parë të sezonit ndaj një ekipi nga pjesa e sipërme e tabelës, duke barazuar 1-1 me Borussia Dortmund falë një goli spektakolar me kokë nga Ransford-Yeboah Königsdörffer në minutën e 97-të.

Hamburg – Dortmund 1-1

Dortmundi kaloi në avantazh në minutën e 64-t me golin e Carney Chukwuemeka-s, por nuk arriti të mbyllte ndeshjen. Hamburgu nuk u dorëzua dhe vazhdoi të kërkonte barazimin, duke shpërdoruar disa raste.

Në sekondat e fundit, pas një krosimi të saktë nga Miro Muheim, Königsdörffer realizoi golin e shpëtimit për vendasit, duke sjellë festë të madhe në Volksparkstadion. Ky barazim u jep moral të madh vendasve, ndërsa Dortmund humbet mundësinë për t’u ngjitur më lart në renditje.

Bayer Leverkusen fitoi me rezultat të thellë 6-0 ndaj Heidenheim. Patrik Schick shënoi që në minutën e 2-të pas një asisti nga Poku, ndërsa Jonas Hofmann dyfishoi me kokë në minutën e 16-të. Pesë minuta më pas, Schick realizoi golin e dytë personal pas një gabimi mbrojtës. Arthur shënoi golin e katërt në minutën e 27-të me një goditje të saktë, ndërsa Ibrahim Maza e çoi rezultatin në 5-0 në fund të pjesës së parë. Në minutën e 53-të, Maza realizoi sërish për 6-0, duke vulosur një fitore të lehtë dhe dominuese për Leverkusenin.

Leverkusen – Heidenheim 6-0