Kingsli Koman i jep lamtumirën pas gati 10 vitesh Bajernit të Mynihut për të nisur një aventurë të re përkrah Kristiano Ronaldos tek Al-Nasr.

Përmes një postimi në rrjetet sociale, futbollisti francez bën reagimin e fundit për tifozët bavarezë dhe klubin.

“Është e vështirë të besohet se kanë kaluar gati dhjetë vjet që kur e bëra Mynihun shtëpinë ime që në moshën 19-vjeçare. Gjatë gjithë kësaj kohe, kam qenë me fat të ndaj kujtime dhe suksese të paharrueshme me këtë klub të jashtëzakonshëm: 9 tituj të Bundesligës, 6 Superkupa, 3 Kupa të Gjermanisë, një Kupë Bote për Klube dhe, mbi të gjitha, momenti im më krenar: shënimi i golit të fitores në finalen e Ligës së Kampioneve 2020 në Lisbonë”.

Për tifozët: “Mbështetja juaj, në çdo triumf dhe çdo sfidë, ka qenë shumë e rëndësishme për mua. Gjithmonë do ta mbaj me vete dashurinë, pasionin dhe besnikërinë tuaj. Jam thellësisht mirënjohës për të gjithë trajnerët, stafin, shokët e ekipit dhe çdo anëtar të stafit me të cilin kam pasur privilegjin të punoj gjatë këtij udhëtimi. Ky klub do të jetë gjithmonë pjesë e imja dhe i uroj Bajernit vetëm suksese të vazhdueshme në sezonet që vijnë. Nga thellësia e zemrës sime, faleminderit”, shkruan ai.