Ish-kapiteni i Kombëtares së Anglisë, Paul Ince, është dënuar me pezullim të patentës për 12 muaj dhe një gjobë prej 7.085 £, pasi ka pranuar akuzën për drejtim mjeti në gjendje të dehur.

57-vjeçari u paraqit të premten në gjykatën e Chesterit, ku pranoi se kishte drejtuar Range Rover-in e tij të zi mbi kufirin ligjor të alkoolit më 28 qershor në qytetin Neston, në Cheshire.

Gjyqtari Jack McGarva u shpreh qartë në sallën e gjyqit: "Nëse duhet të ngasësh makinën, nuk duhet të pish aspak."

Ince u gjobit me 5.000 £, ndërkohë që iu shtuan edhe 2.000 £ si tarifë ligjore detyruese, si dhe 85 £ për shpenzime procedurale.

Pavarësisht situatës serioze, Ince u shfaq i qetë në gjykatë, duke nënshkruar autografe dhe bërë selfie me një tifoz. Karriera e tij si futbollist përfshin klube të mëdha si Manchester United, Liverpool, Inter dhe West Ham, ndërsa me fanellën e Anglisë regjistroi 53 ndeshje dhe mbajti edhe shiritin e kapitenit.

Pas përfundimit të karrierës si lojtar, Ince ka qenë trajner me rezultate të ndryshme, duke drejtuar ekipe si Blackburn Rovers (ku u shkarkua pas vetëm gjashtë muajsh), Blackpool (i larguar me SMS në vitin 2014) dhe më së fundmi Reading, gjatë viteve 2022–2023.