Shqipëria zbret në fushë pas pak minutash, për ndeshjen me Moldavinë. Ndihmësi i trajnerit Sylvinho, Zabaleta ka analizuar rivalin, par takimit kualifikues të Euro 2024.

A kemi një strategji konkrete sot për mënyrën si do të qasemi në ndeshje?

Ne do të vazhdojmë të luajmë në mënyrën që kemi luajtur në të gjithë ndeshjet. Moldavia është shumë e organizuar në goditjet standarde, në luftën në ajër dhe në kundërsulm, por ne do të bëjmë lojën tonë, pasi nuk kemi asnjë arsye për të ndryshuar strategji.

Moldavia shënon shumë nga goditjet standarde dhe presingu. A keni marrë masa për këtë aspekt?

Patjetër që e kemi studiuar shumë mirë kundërshtarin dhe e kemi parë që janë shumë të zotë në goditjet standarde. Jemi përgatitur mirë në këtë drejtim dhe kemi porositur lojtarët që të tregohen të kujdesshëm dhe të zgjuar, në mënyrë që të shmangim faullet afër zonës dhe të mos u japim mundësi të na godasin me armët e tyre më të forta.

E dimë shumë mirë që të gjithë shqiptarët presin rezultat pozitiv për të siguruar kualifikimin në Europianin e Gjermanisë. Shpresojmë shumë që të fitojmë dhe t’i bëjmë të gjithë krenarë, por duhet të tregojmë cilësitë tona në fushë për 90 minuta. Ka shumë eufori, por u kemi kërkuar lojtarëve që të mos bëjnë asgjë më pak dhe asgjë më shumë sesa atë që kanë bërë në ndeshjet e tjera. Kanë bërë shumë mirë dhe duam që të tregojnë vazhdimësi.

Jeni amerikano-jugorë, por shumë pranë kualifikimit në Europian…

Që kur kemi ardhur në Shqipëri, jemi shumë të lumtur që punojmë me njerëz të shkëlqyer. Kemi shijuar dhe po vazhdojmë ta shijojmë të gjithë kohën tonë në Shqipëri. Për mua si një amerikano-jugor është diçka fantastike të shkoj në një Europian, pasi si futbollist ishte e pamundur.