Postimet që bëri në rrjetet sociale në mbështetje të Palestinës, duket se i kanë kushtuar shumë sulmuesit të Mainz, Anwar El Ghazi.

Mediet gjermane bëjnë me dije se klubi i Mainzit ka vendosur që të ndërpresë kontratën e El Ghazit, ndërsa më 17 tetor, skuadra e Bundesligas e cilësoi postimin e sulmuesit “të papranueshëm”.

“Mainz ka liruar Anwar El Ghazi nga detyrat e tij. Vendimi vjen si rezultat i një postimi të bërë në rrjetet sociale nga 28-vjeçari që u shfaq mbrëmjen e së dielës, të cilin më pas e fshiu. Në postim, El Ghazi mbajti një qëndrim për konfliktin e vazhdueshëm në Lindjen e Mesme që u konsiderua i papranueshëm nga klubi. Para marrjes së këtij vendimi, klubi dhe lojtari zhvilluan diskutim të thellë.

Mainz respekton faktin se ka perspektiva të ndryshme për konfliktin e gjatë që ndodh prej dekadash në Lindjen e Mesme. Megjithatë, klubi po distancohet nga përmbajtja e postimit në rrjetet sociale në fjalë, pasi nuk përputhet me vlerat e klubit”-njoftonte Mainz më 17 tetor.

El Ghazi iu bashkua skuadrës muajin e kaluar dhe sipas raportimeve të medieve gjermane, ai tashmë është informuar se kontrata e tij do të ndërpritet.