Romë - Policia në Gjermani arrestoi një shofer kamioni të akuzuar për aksidentin në Itali vitin e kaluar ku u vra çiklisti profesionist Davide Rebellin dhe e mbajti atë në pritje të procedurave të ekstradimit, thanë të shtunën prokurorët në të dy vendet.

Ëolfgang Rieke akuzohet për vrasje në rrugë dhe largim nga vendi i një aksidenti. Prokurori i Vicenzës, Lino Giorgio Bruno tha se ai u arrestua të enjten në Muenster me një urdhër arresti evropian. Autoritetet gjermane thanë se ai ishte dorëzuar.

Rebellin, një nga profesionistët më jetëgjatë të çiklizmit, u vra më 30 nëntor gjatë një vrapimi stërvitor pranë qytetit verior italian të Montebello Vicentino.

Në atë kohë, mediat italiane raportuan se kamioni që e goditi nuk ishte ndalur. Por prokurorët, duke përmendur videon në anë të rrugës dhe fotot e dëshmitarëve, thanë se shoferi ndaloi, doli nga kabina dhe iu afrua Rebellin, dhe më pas u kthye në kamion dhe u largua nga vendi i ngjarjes.

Hetimi identifikoi kamionin se i përkiste një firme transporti me bazë në Recke, Gjermani dhe Rieke si shofer, tha Bruno në një deklaratë.

Pas përplasjes kamioni vazhdoi për në destinacionin e tij në Verona dhe u kthye në Gjermani më 3 dhjetor.

Pas kësaj, rimorkioja e kuqe që dyshohet se ishte përfshirë në aksident u shkëput nga traktori dhe u zëvendësua me një të bardhë me targa të ndryshme për identifikim, thanë prokurorët .

Pasi autoritetet kapën kamionin, ekspertët identifikuan dëmet në përputhje me përplasjen dhe përcaktuan se automjeti ishte pastruar me një detergjent të koncentruar, shumë acid, thanë prokurorët. Brenda kabinës funksiononin video kamera dhe pasqyra që duhej t'ia kishin dhënë shoferit pamjen e nevojshme direkte dhe indirekte të çiklistit, thuhet në deklaratë.

Ndërsa u zbulua se Rebellin kishte shkelur rregullat rrugore që kërkonin që ai t'i jepte përparësi kamionit, "një shkelje e tillë nuk kishte efekt shkakësor" në aksident duke pasur parasysh kohën midis shkeljeve të Rebellin dhe përplasjes, thuhet në deklaratë, duke cituar urdhër-arrestin e gjyqtarit. 

I dyshuari iu dorëzua autoriteteve në Steinfurt, afër Muenster, të enjten, i shoqëruar nga avokati i tij mbrojtës, tha në një email për agjencinë gjermane të lajmeve DPA, prokurori i lartë publik Elmar Pleus i zyrës së prokurorit të përgjithshëm Hamm.