Më shumë se një lojë. Nesër mbrëma, Liverpool dhe Real Madrid do të luftojnë për kupën me veshë të madhe në finalen e UEFA Champions League. Një takim i cili do të jetë vendimtar në garën për Topin e Artë për Karim Benzema dhe dy yjet e “të kuqve”, Mohamed Salah dhe Sadio Mane. Për këtë të fundit ndeshja në Paris mund të jetë edhe  e fundit me fanellën e kuqe. Në fund të kontratës në qershor 2023, Senegalezi, fituesi i Kupës së Kombeve të Afrikës, po mendon për ndryshime. Pas gjashtë sezonesh me klubin Mersey dhe tetë në Premier League (ai luajti dy vjet te Southampton), ish-lojtari i Metz-it po i bën vetes një pyetje.

Në intervistën e fundit për “Liverpool Echo”, Mane nuk i siguroi tifozët e skuadrës angleze për qëndrimin.

I pyetur për të ardhmen e tij, ai u përgjigj: “Sinqerisht, mendoj se përgjigja që mund t'ju jap tani është se ndihem mirë dhe jam plotësisht i fokusuar në ndeshjen e së shtunës. Kjo është përgjigja që duhet të jap para finales. Por kthehuni tek unë të shtunën dhe do t'ju jap përgjigjen që dëshironi të dëgjoni, kjo është e sigurt. Është e veçantë. Unë do t'ju jap gjithçka që dëshironi të dëgjoni atëherë (...) Kthehuni të shtunën dhe do t'ju jap përgjigjen që premtoj, por tani për tani le të shkojmë dhe të fitojmë Champions League sepse nuk kam kohë për diçka tjetër.”

Mane është prioriteti i Bayern Munich

Më pas i pyetur për një transferim të mundshëm te Real Madrid, ai qeshi: “Pyetje e mirë! (qesh) Por ajo që dua të them tani është se jam plotësisht i fokusuar te Champions League dhe fitorja, gjë që është shumë më e rëndësishme për mua dhe tifozët e Liverpool-it. Do të bëj gjithçka për të fituar ndeshjen për Liverpool-in.” Mënyra më e mirë për të përfunduar sezonin apo edhe për t'i dhënë fund aventurës së tij me “të kuqtë”. Sipas Bild, sulmuesi dëshiron t'i dhurojë trofeun e Champions klubit të tij përpara se të largohet këtë verë. Ai dëshiron një sfidë të re dhe të zbulojë një kampionat të ri pas fitores në Angli.

Mediat gjermane shtojnë se senegalezi është prioriteti kryesor i Bayern Munichut, i cili ka folur në telefon me lojtarin dhe ballë për ballë me agjentin e tij në Mallorca. Diskutimet do të kishin ecur mirë mes palëve të ndryshme. Drejtuesit e Bayern do të donin ta bashkonin me Thomas Muller dhe Kingsley Coman, në mbështetje të Robert Lewandowskit shpjegon “Bild”. Përveç nëse ardhja e tij është planifikuar për të kompensuar largimin e polakut te Barça. Gjithsesi, bavarezët duan të kapin Sadio Mane, për të cilin synojnë të ofrojnë 30 milionë euro për të blerë vitin e fundit të kontratës. Mbetet për t'u parë nëse Liverpool do të pranojë të largojë një nga yjet.