Lajmet që vijnë nga Kina janë gjithmonë shqetësuese për grupin Suning dhe ushqejnë frikën se disa pasoja mund të vijnë edhe tek Inter.

E fundit është falimentimi i gjigantit të pasurive të paluajtshme, Evergrande , i cili ka qenë prej kohësh duke u përballur me vështirësi.

Lajmi është bërë i ditur nga agjencia ndërkombëtare Fitch, e cila është e përfshirë në mënyrë të drejtpërdrejtë me familjen Zhang dhe Suning, pasi në vitin 2017 i kishte dhënë hua afro 2,6 miliardë euro.

Në vitin 2020, pronarët e Interit kishin rinegociuar marrëveshjen me grupin imobiliar, ku për të garantuar likuiditetin e kompanisë Evergrande hoqën dorë nga kthimi monetar i borxhit, duke qëndruar aty si aksionerë.

Ajo situatë ndikoi në mënyrë të dukshme edhe te klubi i Interit. Problemet e gjigandit të tregut imobiliar, shkaktuan rritjen e borxheve të kompanisë Suning, duke qenë se vlera e aksioneve ka rënë në mënyrë të ndjeshme gjatë muajve të fundit.

Vlerësimet e agjencisë Fitch vetëm sa e kanë rënduar situatën financiare të pronarëve të skuadrës zikaltër. Kjo edhe pas njoftimit se qeveria e Pekinit mund të vendosë të mos ndërhyjë për të shpëtuar grupin nga borxhet.

Kjo çështje e ka goditur rëndë Jindong Zhang, i cili e kontrollon Interin nëpërmjet Suning Holdings Group, pikërisht kompanisë që me investimin në tregun imobiliar humbi afro 2,1 miliardë euro. Një situatë, në të cilën grupi Suning mund të jetë i detyruar të shesë Interin.