Taulant Seferi ishte një nga risitë e listës së trajnerit Edi Reja për eliminatore kundër Turqisë dhe Moldavisë.

Në një deklaratë për mediat, sulmuesi nga Kumanova tha se është pritur shumë mirë te Kombëtarja kuqezi ku konfirmoi se mbizotëron një atmosferë pozitive.

“Unë e kam ndjekur gjithmonë Kombëtaren dhe jam shumë i befasuar dhe i kënaqur nga pritja. Po shikoj një pozitivitet, shpresoj që këtë atmosferë ta përcjellim edhe në ndeshjet e ardhme”, tha fillimisht ai.

Jeni gati për të luajtur shanset tuaj për një vend në formacion?

Kam pritur ftesën të isha në Kombëtare, pasi mendoj që jam mirë dhe shpresoj të bëj më të mirën për fanellën kuqezi. E rëndësishmja është se po ndihem mirë, për minutat vendos trajneri. Unë do jap maksimumin në stërvitje dhe në ndeshje.

Dy ndeshjet e fundit e keni nisur nga stoli…

Këto 2 ndeshjet e fundit me klubin nuk kam luajtur nga fillimi se kisha një dëmtim të vogël. Tani besoj se ndihem shumë mirë. Trajneri ka marrë në Kombëtare ata që janë në formë më të mirë. Duhet të fokusohemi vetëm te fitorja në 2 ndeshjet e radhës. Jemi një grup shumë i mirë i lojtarëve.

Ku e shihni veten në skemat e trajnerit Reja?

Nuk është se kemi punuar taktikisht në 2 stërvitjet e para. Jam duke luajtur si sulmues qendre, nuk e kam problem të luaj edhe anash, në formacionin 3-5-2 të trajnerit. Sidoqoftë kudo që të ketë nevojë skuadra jam i gatshëm