Ministria e Arsimit ka publikuar një udhëzim të ri, sipas të cilit numri mesatar i nxënësve në klasa ulet nga 35 në 30, në funksion të zhvillimit më të mirë të procesit mësimor. Por sipas ekspertëve, arsyeja kryesore e marrjes së këtij vendimi është emigrimi masiv dhe rënia e numrit të nxënësve në shkolla. Edhe shifrat zyrtare tregojnë se në arsimin parauniversitar regjistrimet kanë pësuar ulje të ndjeshme në vitin shkollor 2022-2023, krahasuar me një vit më parë.
Nga SYRI TV
Shpopullimi është e vërteta reale që ka detyruar Ministrinë e Arsimit të nxjerrë një udhëzim për uljen e numrit të nxënësve në klasa, sipas ekspertit të Arsimit Ndriçim Mehmeti. Në optikën e tij kjo po bëhet për të mbuluar mangësitë në sistemin arsimor, ndërkohë që rënia e numrit të nxënësve nga viti në vit, është një faktor tregues që po emigron e gjithë familja. Ndërkohë ky udhëzim sipas tij, ka filluar të shtrijë efektet negative edhe tek mësuesit.
Sociologia Entela Binjaku, thotë se prindërit kërkojnë më shumë cilësi në mësimdhënie për fëmijët e tyre, ndaj shohin emigrimin si zgjidhje, ndërsa rendit edhe faktorë të tjerë.
Edhe shifrat zyrtare tregojnë rënie të ndjeshme të numrit të nxënësve në arsimin parauniversitar, çka është një tjetër tregues që udhëzimi i Ministrisë së Arsimit ka ardhur për këtë arsye.
Në shkollat 9-vjeçare, regjistrimet këtë vit kanë pësuar rënie me 4% krahasuar me një vit më parë, ndërsa regjistrimet në klasat e dhjeta kanë rënë me 9%. Në arsimin e mesëm regjistrimet e nxënësve në total kanë rënë me 7,4 % këtë vit.
Shqetësuese situata paraqitet edhe me maturantët, të cilët nga 30 mijë që janë në të gjithë vendin, rreth 11 mijë prej tyre kanë aplikuar për studime jashtë vendit, duke plotësuar formularin A1 e duke zgjedhur ‘po’ në opsionin ‘Aplikon për jashtë’.
Të dhënat zyrtare nga INSTAT tregojnë se në vitin shkollor 2022-2023, u regjistruan në arsimin zyrtar 554.222 nxënës dhe studentë, me një ulje prej 4,1 %, krahasuar me vitin e kaluar shkollor.
SHKOLLAT 9- VJEÇARE, REGJISTRIME KLASA E PARË
VITI 2021-2022 30 mijë nxënës
VITI 2022-2023 29 mijë nxënës
1000 më pak se një vit më parë, rënie 4%
REGJISTRIME KLASA E DHJETË (Pa përfshirë shkollat e arsimit profesional)
VITI 2021-2022 31 mijë nxënës
VITI 2022-2023 28 mijë nxënës
3000 më pak se një vit më parë, rënie me 9%
Gjithsej nxënës në sistemin parauniversitar INSTAT
453,989 nxënës të regjistruar në arsimin parauniversitar gjatë vitit shkollor 2021-2022
432.870 nxënës të regjistruar në arsimin parauniversitar gjatë vitit shkollor 2022-2023
Rënie me 4,7 %
ARSIMI I MESËM
REGJISTRIME TOTAL NË ARSIMIN E MESËM
VITI SHKOLLOR 2021-2022 103.467 nxënës
VITI SHKOLLOR 2022-2023 95.845 nxënës
Ulje prej 7,4 %, krahasuar me vitin e kaluar shkollor.
MATURANTËT QË DUAN TË IKIN JASHTË
MATURA SHETËRORE 2023 10.873 MATURANTË
MATURA SHETËRORE 2022 12.166 MATURANTË
MATURA SHETËRORE 2021 10.906 MATURANTË
REGJISTRIME NXËNËS DHE STUDENTË INSTAT
554.222 nxënës dhe studentë u regjistruan në arsimin zyrtar në vitin shkollor 2022-2023.
Ulje prej 4,1 %, krahasuar me vitin shkollor 2021-2022.
© SYRI.net