Ditën e sotme në Tiranë, Drejtori i Përgjithshëm i FAO, QU Dongyu u takua me Frida Krifca, Ministër për Bujqësinë dhe Zhvillimin Rural të Shqipërisë.

Kështu shkruan faqja e FAO, në një postim të saj në rrjetet sociale.

FAO është një aktor kryesor në rritje për zhvillimin e bujqësisë, zonave rurale, klimës dhe mjedisit, duke kontribuar në tre nga katër rezultatet e Kornizës së Bashkëpunimit për Zhvillimin e Qëndrueshëm të Kombeve të Bashkuara.

Gjatë takimit, ministrja shprehu vlerësimin e saj për partneritetin strategjik dhe bashkëpunimin e ngushtë të FAO-s në disa fusha, duke përfshirë mbështetjen e politikave, mbështetjen për fermat e vogla dhe forcimin e zinxhirëve të vlerës.

Të dy rikujtuan diskutimin e tyre të fundit në Dhjetor në lidhje me forcimin e bashkëpunimit për transformimin e sistemeve agroushqimore dhe nxitjen e inovacionit dhe investimeve në bujqësi. Drejtori i Përgjithshëm theksoi disa nga avantazhet kryesore të Shqipërisë në bujqësi, si biodiversiteti i saj dhe kushtet e favorshme klimatike, që ofrojnë mundësi të mira investimi në sektorin e bujqësisë.

Ministrja Krifca theksoi disa sfida kryesore ku ekspertiza e FAO-s është thelbësore, si mbështetja e politikave për ndërtimin e zinxhirëve të qëndrueshëm të vlerave ushqimore, në infrastrukturën mbrojtëse nga përmbytjet për shkak të ndryshimeve klimatike, si dhe menaxhimin e qëndrueshëm të blegtorisë.

Drejtori i Përgjithshëm ndau përvojën e tij në shpërndarjen gjeografike të bujqësisë dhe qasjen holistike, duke nënvizuar pjesëmarrjen e Shqipërisë në iniciativën ‘Një Vend, Një Produkt Prioritar’ (OCOP), aksesin ne tregjet ndërkombëtare, zinxhirin e vlerës dhe zhvillimin e kulturave bujqësore që gjenerojnë të ardhura, si dhe tërheqjen e të rinjve në bujqësi përmes bujqësisë dixhitale.