Banorët e fshatit Sulaj në njësinë administrative Dërmënas në Fier, u ngritën në protestë për mungesën e investimeve në infrastrukturë, kanalizime dhe shërbime. Banorët shprehen se për investimet janë diskriminuar për shkak të bindjeve politike. Pas protestës reagoi bashkia Fier, duke premtuar investime.
Nga SYRI TV
Mungesën e investimeve në fshatin e tyre, banorët e fshatit Sulaj e lidhin me përkatësitë dhe bindjet politike. Sipas banorëve, fshati Sulaj është i vetmi në Dërmënas, që nuk ka njohur asnjë investim, madje edhe pse vetë kryebashkiaku i Fierit u ka bërë jo pak premtime.
Siç shihet nga pamjet, në fshat rruga është krejtësisht e amortizuar, qendra shëndetësore është jashtë funksionit, ndërsa banorët përballen dhe me mungesën e ujit.
Pas protestës ka reaguar edhe bashkia Fier nëpërmjet drejtoreshës së shërbimeve publike Gazmira Plesati, e cila tha se rruga e fshatit Sulaj do të përfshihet në projektet e investimeve në vijim.
Për shkak të mungesës së investimeve dhe pamundësive ekonomike, banorët e fshatit Sulaj u shprehën gjatë protestës se shumë bashkëfshatar të tyre po largohen në emigrim.
Gazetar: Xh. Beharaj
Operator: A. Mara
Redaktor: J. Hoxhaj
Montazhier: L. Kotri
© SYRI.net