Kafeja është një nga pijet më të preferuara në botë, e njohur për rritjen e energjisë dhe përmirësimin e përqendrimit. Por ekspertët tregojnë se ekziston një mënyrë e thjeshtë për ta bërë atë edhe më të dobishme dhe të shijshme: shtimi i kakaos.

Ky kombinim natyral jo vetëm që pasuron shijen, por mund të ketë ndikim të fortë pozitiv në humor, shëndetin e zemrës dhe të trurit. Flavonoidet e kakaos, të kombinuara me kafeinën, krijojnë një sinergji që ndihmon në ruajtjen e energjisë dhe përqendrimit të qëndrueshëm.

“Kakaoja është e pasur me polifenole, kryesisht flavanole, dhe shumë efekte të dobishme i atribuohen këtyre komponimeve,” shkruan revista Vogue duke iu referuar hulumtimeve mbi efektet shëndetësore të saj. Konsumi i kakaos është lidhur me uljen e rrezikut të sëmundjeve kardiovaskulare, çrregullimeve metabolike, inflamacionit dhe me përmirësimin e shëndetit të lëkurës dhe sistemit nervor, raporton Index.hr.

Përveç efekteve antioksiduese, teobromina e kakaos dhe kafeina e kafesë stimulojnë prodhimin e endorfinave, serotoninës dhe dopaminës, duke përmirësuar humorin. Çokollata e zezë, nga ana tjetër, mund të veprojë edhe si prebiotik për mikrobiomën e zorrëve, duke ndikuar pozitivisht në mirëqenie.

Për zemrën, flavonoidet e kakaos ndihmojnë në uljen e presionit të gjakut, përmirësimin e funksionit të enëve të gjakut dhe rritjen e nivelit të kolesterolit “të mirë” HDL.

Ekspertët rekomandojnë shtimin e një lugë çaji kakao të pastër, të paëmbëlsuar, në një filxhan kafeje – mundësisht pasi kafeja të jetë ftohur pak – për të ruajtur vlerat e plota ushqyese të flavonoideve.

Një përzierje e thjeshtë që e kthen filxhanin e përditshëm të kafesë në një eliksir shëndeti.