Shqipëria në ditën e 48-të të protestave kundër qeverisë, kërkohet dorëheqja e Ramës

Shqipëria hyn sot në ditën e 48-të të protestave të përditshme kundër qeverisë, ndërsa organizatorët kanë njoftuar se mobilizimi do të vijojë edhe gjatë sezonit veror.

Edhe këtë mbrëmje, qytetarët pritet të mblidhen përpara godinës së Kryeministrisë në Tiranë, ku do të kërkojnë dorëheqjen e kryeministrit Edi Rama dhe ndryshim të qeverisjes.

Lëvizja protestuese, e cila nisi si reagim ndaj projektit në Zvërnec, është zgjeruar në një protestë më të gjerë kundër qeverisë. Gjatë javëve të fundit, pjesëmarrësit kanë zhvilluar marshime në rrugët kryesore të kryeqytetit, duke shprehur qëndrimet e tyre përmes pankartave, fjalimeve dhe thirrjeve.

Protestuesit kanë theksuar se protestat nuk do të ndërpriten gjatë verës, duke u bërë thirrje qytetarëve brenda dhe jashtë vendit të vijojnë pjesëmarrjen. Edhe protesta e mbrëmjes së sotme pritet të jetë pjesë e këtij aksioni të përditshëm para Kryeministrisë.