PD nis turin e foltoreve, mobilizohen demokratët, pjesëmarrje masive në njësinë nr.9

Partia Demokratike ka nisur ciklin e ri të foltoreve, duke shënuar një intensifikim të takimeve me strukturat dhe përkrahësit në bazë. Në fokus të mbrëmjes së sotme është njësia nr. 9 në Tiranë, ku kryetari i PD-së, Sali Berisha, zhvilloi një bashkëbisedim të hapur me demokratët.

Foltoret, që pritet të zhvillohen me një ritëm të shpeshtë në ditët dhe javët në vijim, po shënojnë një pjesëmarrje të dukshme dhe të gjerë të mbështetësve të opozitës. Salla e mbushur plot dhe pjesëmarrja masive bien në sy si një tregues i mobilizimit të elektoratit demokrat në këtë fazë të re të veprimtarisë politike.

Ndërkohë, një natë më parë, opozita zhvilloi tubimin e radhës “Foltorja 2”, një tjetër demonstrim i fuqishëm politik. Gjatë aktivitetit u artikuluan qartësisht kërkesat e opozitës shqiptare për largimin e qeverisë Rama, të cilat opozita i cilëson si domosdoshmëri për rikthimin e drejtësisë dhe transparencës në vend.

Sipas përfaqësuesve të PD-së, kjo seri foltoresh synon jo vetëm shpalosjen e qëndrimeve politike, por edhe forcimin e komunikimit me qytetarët dhe aktivizimin e strukturave të partisë në mbarë vendin.