Vendimi i qeverisë “Rama” për të legalizuar kanabisin mjekësor, pasi e parapërgatiti opinionin më shumë se një vit më parë, për z. Arben Hajdarmataj, ish-drejtues në strukturat e Policisë së Shtetit, nuk është thjesht për qëllim mjekësor, por i hap rrugën ose në një farë mase, e ligjëron këtë aktivitet kriminal.

Madje, tha Hajdarmataj, në një prononcim për SYRI TV, ky aktivitet “ka lulëzuar në vitin 2016, kur Ministria e Brendshme drejtohej nga Saimir Tahiri në atë kohë; unë mendoj që edhe me bekimin e strukturave më të larta të qeverisë, sepse një person i vetëm gjithë atë sipërmarrje kriminale nuk mund ta merrte pa miratimin ndoshta edhe pak më lart sesa posti i tij ministror.”

I pyetur nga gazetari Arnold Kariqi nëse ishte i nevojshëm për vendin, legalizimi i kanabisit mjekësor, z. Hajdarmataj tha ndërmjet të tjerave:

“Unë mendoj se në aspektin e nevojës siç e parashtroni edhe ju pyetjen, unë them që nuk ka kurrfarë nevoje për këtë lloj aktiviteti, aq më tepër kur bëhet fjalë ëpr kanabisin, pavarësisht se i vihet emri mjekësor apo jomjekësor.

Nëse do të trajtohet çështja për kanabis mjekësor, ne kemi pothuajse ngjitur Maqedoninë e Veriut, e cila e ka legalizuar këtë kanabis e nëse ka pasur nevoja realisht mjekësore si medikament, ka pasur mundësi praktike që të tërhiqet e të trajtohet si medikament mjekësor.

Por unë mendoj që qëllimi i legalizimit të kanabisit nuk është thjesht mjekësor. Fatkeqësisht Shqipëria, dihet tani që jemi vend, sidomos në Ballkanin Perëndimor, vendi kryesor i kultivimit dhe i tregtimit të kanabisit ose hashashit siç quhet, që hyn në drogat e lehta sot në termat e komunikimit.

Në këtë aspekt, mendoj, dhe ky legalizim ose projektligj (sepse do të kalojë në parlament) i hap rrugën ose në një farë mase e ligjëron këtë aktivitet kriminal, i cili fatkeqësisht ka lulëzuar, jo se nuk ka pasur në Shqipëri, por ka lulëzuar në vitin 2016 kur Ministria e Brendshme drejtohej nga (Saimir) Tahiri në atë kohë, unë mendoj që edhe me bekimin e strukturave më të larta të qeverisë, sepse një person i vetëm gjithë atë sipërmarrje kriminale nuk mund ta merrte pa miratimin ndoshta edhe pak më lart sesa posti i tij ministror.

Qëllimi i legalizimit të kanabisit nuk ka filluar dje me miratimin e projektligjin nga qeveria. Ky ka kohë që ka filluar, ne kemi diskutuar në studio. Mënyra si iu servir publikut ishte tamam një farsë sepse gjoja u bë një sondazh, gjoja u bë një tip pyetësori që nuk kishte në mënyrë kategorike asnjë lloj transparencë:

Kush e pa?! Kush e mati?! Kush ishin ata formularë?! Kush ishte oponenca që iu bë?! - Pra të gjitha këto janë pikëpyetje të mëdha që është një dëshirë e qeverisë, sidomos e Kryeministrit për ta legalizuar këtë bimë, për ta kamufluar do të thosha unë më mirë, do të thotë që të ketë hapësira më shumë për trajtimin dhe kultivimin, pasi ka një rritje çmimi në tregjet ndërkombëtare dhe të kanabisit.”/ar.sh/SYRI.NET