Këto ditë, në mediat pranë qeverisë, dhe për rrjedhojë edhe pranë Lulzim Bashës, ka pasur raportime se çështja e vendimit të Departamentit të Shtetit për Sali Berishën ka shkuar në Kongresin Amerikan.

Edhe pse këto media e kanë shitur këtë procedurë rutinë si një lajm të madh, një goditje e fortë vjen nga kongresmeni amerikan, Lee Zeldin. Republikani shkruan në një letër drejtuar Departamentit të Shtetit dhe Sekretarit Blinken, se u bë pesë muaj që nuk i japin informacion për rastin e Sali Berishës.

Ai e quan këtë gjë të dyshimtë, duke lëshuar akuzën e fortë se Blinken po pengon Kongresin që kërkon transparencë për këtë çështje.

Në letër, Zeldin shkruan se qeveria duhet të japë llogari dhe të bëjë transparencë përpara Kongresit.

“Po ju shkruaj sot në vazhdim të letrës time të datës 27 gusht 2021, duke kërkuar një përgjigje me shkrim dhe takim me zyrtarin e duhur të Departamentit të Shtetit për të diskutuar në thellësi dhe për të shqyrtuar informacionin që përshkruan “korrupsionin domethënëse” në lidhje me procesin që Departamenti i Shtetit ka përdorur për të sanksionuar Sali Berishën.

Kanë kaluar pesë muaj që kur kam bërë kërkesën time origjinale, e cila është në thelb më shumë se koha e mjaftueshme për t’u përgjigjur në mënyrë adekuate. Kjo është kërkesa ime e tretë për informacion shtesë që kur kam ngritur çështjen e sanksionimit të Sali Berishës gjatë seancës dëgjimore me Sekretarin Blinken në Komisionin e Punëve të Jashtme të Dhomës së Përfaqësuesve më 7 qershor 2021.

Kongresi luan një rol të jashtëzakonshëm mbikëqyrës për degën ekzekutive, duke përfshirë Departamentin e Shtetit, megjithatë zyra ime ka marrë në mënyrë alarmuese pak detaje në përgjigje të pyetjeve të mia. Është e papranueshme dhe e dyshimtë që Departamenti  i Shtetit nuk e ka përmbushur mjaftueshëm këtë kërkesë për informacion shtesë në kohën e duhur dhe në vend të kësaj ka zgjedhur të ngadalësojë një kërkesë të Kongresit për transparencë.

Duke pasur parasysh peshën e vendimit tuaj, ju kërkoj që t’i kushtoni kësaj çështjeje vëmendjen që meriton dhe pres përgjigjen tuaj të menjëhershme,” shkruan Zeldin.