"Sot në Novi Sad, vendlindjen para dy vitesh të atij projekti të dështuar, zhvillohen “funeralet” e tij, pa prezencen e autorit dhe të tellallëve."
Nga Tritan Shehu.
Thjesht të tre po i fshihen asaj ceremonie funebre të “Ballkanit të Hapur” - alias “Jugosllavia e Re”. Dhe nuk kishte si të përfundonte ndryshe, ai ishte vetëm një projekt në përputhje me idenë e Serbisë për “Jugosllavine e Re”, me lider Vuçiç e supremacinë serbe në rajon. Ai synonte të vendoste Serbinë në pozicione të avantazhuara edhe ekonomike. Ai synonte të zbehte Kosovën dhe pavarësinë e saj. Ai synonte të shpëlante Serbinë nga çfarë ajo i shkaktoi Ballkanit e popujve te tij në dhjetra vite, pa asnjë kërkesë faljeje nga ajo.
Ky projek si shtojcë e Unionit EuroAzian të Rusisë, nëpërmjet Serbisë, jashtë dhe në kontrast me projektet rajonale të Brukselit, synonte të tërhiqte Ballkanin Perëndimor drejt Lindjes, duke e larguar nga BE.
Fatmirësisht ky projekt, larg interesave jetike të Shqipërisë, Kosovës, shqiptarëve e të gjithë rajonit si pjesë e BE, nuk pati jetë të gjatë.
Ai po varroset me dhëmbët e qumështit akoma në gojë.
Ishin veçanërisht ngjarjet e fundit në Mal të Zi, tanket e avionët rusë në prag të Kosovës që i dhanë goditjen e fundit.
Por jo vetëm, ishte dhe qëndrimi i forcave properëndimore në rajon, i partnerëve tanë perëndimorë me kundërshtitë apo përbuzjen ndaj tij që i vuri pikat mbi i këtij realiteti.
Dhe këtu dua të falenderoj edhe zonjën Leyen për atë që theksoi dje në Tiranë duke e hedhur në kosh këtë “Ballkan të Hapur”:
Asnjë projekt i dobishëm i bashkëpunimit rajonal nuk mund të jetë jashtë “Procesit të Berlinit”, i painkluduar në të dhe pa pjesëmarrjen si të barabartë të të gjitha vendeve, tha ajo.
Projekti i Berlinit është një projekt i BE-së, i iniciuar nga Merkel.
“Ballkani i Hapur” ishte një projekt jashtë Brukselit, me autor, zbatues e garant Vuçiç të lidhur me atë Union të Rusisë si kundërpeshë e BE, trevendesh e diskriminues ndaj të tjerëve.
Varrosja reale e tij sot është një hap pozitiv për rajonin drejt Europës. Tashti të gjithë duhet të koncentrohemi vetëm te projektet e Brukselit për rajonin, te përmbushja e standarteve të BE nga secili vend!
© SYRI.net