Procesi kundër kriminelit shqiptar të drogës Franc Gergely (Çopja) në Bruksel u pezullua të hënën për shkak të pranisë së një “rriqre” në sallën e gjyqit. Sipas Shërbimit Federal të Drejtësisë, një ekip dezinfektimi kontrolloi të gjithë sallën dhe gjeti vetëm një insekt: “Procesi, në parim, mund të vazhdojë të martën.”

Nga Cedric Lagast dhe Chris Verhaeghe, DE STANDAARD

“Kjo ishte e tepërt,” vlerësoi të hënën në mëngjes kryetarja e trupit gjykues, Isabelle de Saedeleer, gjatë procesit të jurisë kundër shqiptarit Franc Gergely dhe tetë personave të tjerë, të akuzuar për vrasje.

Ndërsa prokurorët e prokurorisë federale po lexonin aktakuzën, një anëtar i jurisë pa papritur një rriqër mbi krahun e tij. Rriqrat janë insekte shumë këmbëngulëse, të cilat ushqehen me gjak njeriu. Ato fshihen nëpër skuta dhe janë jashtëzakonisht të vështira për t’u zhdukur.

Për këtë arsye, De Saedeleer i dërgoi të gjithë të pandehurit, avokatët dhe anëtarët e jurisë në shtëpi, me këshillën që rrobat t’i lanin në 60 gradë ose t’i fusnin në frigorifer. Procesi u detyrua të ndërpritej.

Megjithatë, drejtësia ka bërë përpjekje të mëdha vitet e fundit për ta sjellë Franc Gergelyn para gjykatës. Më 23 dhjetor 2023, pas negociatave të gjata, shqiptari u dërgua me avion nga Emiratet e Bashkuara Arabe dhe u ekstradua në vendin tonë. Ai dyshohet se është porositësi i vrasjes së shqiptarit Ardit Spahiu (38 vjeç), i cili u qëllua për vdekje në mes të ditës në rrugë në Bruksel më 27 nëntor 2021. Sipas prokurorisë federale, kjo ishte një larje hesapesh si pasojë e një konflikti mes klanit Çopja të Gergelyt dhe klanit Alibej, ku bënte pjesë viktima.

Sipas hetimeve, klani Alibej i kishte vjedhur rivalëve një ngarkesë prej 50 kilogramësh kokainë në vitin 2018 në Londër. Si hakmarrje, gjashtë anëtarë të klanit Alibej do të vriteshin, përfshirë edhe Spahiun, i cili ishte fshehur në Bruksel. Sulmi ishte planifikuar për njëmbëdhjetë muaj.

“Një rriqër e ngordhur”

Procesi po zhvillohej nën masa shumë të rrepta sigurie në kompleksin ‘Justitia’, ish-ndërtesa e NATO-s në Evere. “Këtë pasdite u krye një ndërhyrje me mjete të posaçme dezinfektimi, në bashkëpunim me ekipin teknik të ndërhyrjes,” deklaroi Shërbimi Federal i Drejtësisë të hënën në mbrëmje. “Nga shërbimet tona u gjet një insekt i ngordhur. Nuk u gjetën ekzemplarë të tjerë. Situata është nën kontroll”.

Nëse insekti ishte realisht një rriqër, kjo nuk është konfirmuar ende. Sipas FOD Justitie, kontrollet për rriqra bëhen rregullisht dhe kjo do të ishte hera e parë që një i tillë gjendet në ndërtesën ‘Justitia’.

“Salla do të pastrohet edhe një herë në mënyrë shumë të imtësishme. Por, në parim, seanca mund të vazhdojë në orën 11”.