ARAGON DIGITAL

Garda Civile e Spanjës ka çmontuar një organizatë kriminale shqiptare, e dedikuar ndaj kultivimit të marihuanës në ambiente të brendshme në provincën e Zaragozës, pas një operacioni që ka rezultuar me nëntë persona të arrestuar, tetë kontrolle të njëkohshme dhe sekuestrimin e më shumë se 2.000 bimëve kanabis. Rrjeti vepronte në disa magazina industriale dhe banesa të shpërndara në disa komuna përreth Zaragozës dhe kishte vjedhur energji elektrike me vlerë mbi 210.000 euro, e barasvlershme me konsumin vjetor të mbi 250 familjeve.

HETIMI NISI NË VITIN 2024

Hetimet nisën në shtator 2024 nga Ekipi i Policisë Gjyqësore i Gardës Civile në Casetas, pasi u zbulua ekzistenca e mundshme e disa magazinave të përdorura për kultivimin në ambiente të brendshme të marihuanës pranë Zaragozës. Gjatë hetimeve, agjentët identifikuan disa prej anëtarëve të rrjetit, të cilët madje ndërprenë përkohësisht aktivitetin e tyre pasi drejtuesit kryesorë u kthyen në vendin e origjinës.

Megjithatë, në fund të verës së këtij viti, të dyshuarit u kthyen në Spanjë dhe rifilluan aktivitetin e paligjshëm, duke ripërshtatur magazinat për të rinisur kultivimin e kanabisit. Pasi u mblodhën provat e nevojshme, Garda Civile aktivizoi një operacion të gjerë policor.

KONTROLLET, PLANTACIONET DHE VJEDHJA E ENERGJISË

Më 2 dhjetor u kryen tetë kontrolle në magazina të vendosura në Cuarte de Huerva, San Mateo de Gállego, La Puebla de Alfindén dhe Zuera, si dhe në disa banesa në Zaragozë dhe lagjen Garrapinillos. Brenda tyre u gjetën disa plantacione të brendshme me gjithsej 2.013 bimë marihuanë dhe më shumë se 20 kilogramë lule kanabisi gati për shpërndarje.

Magazinat ishin përshtatur plotësisht për kultivimin, me dhoma të ndara me pllaka gipsi për faza të ndryshme të rritjes. Të gjitha instalimet furnizoheshin me energji nëpërmjet lidhjeve të paligjshme me ndriçimin publik, me panele elektrike shumë të sofistikuara. Njëra prej magazinave ishte në fazë përgatitjeje për një plantacion të ri.

Në disa prej këtyre vendeve u arrestuan persona që kujdeseshin vazhdimisht për plantacionet dhe që flinin brenda, në zona të përshtatura me dyshekë, pajisje shtëpiake dhe sende bazike, për të mos i braktisur instalimet.

NJË RRJET I STRUKTURUAR DHE I SIGURUAR MIRË

Hetimi vërtetoi se bëhej fjalë për një organizatë kriminale të strukturuar në mënyrë të përkryer. Kryesori, me banim në Zaragozë, merrej me logjistikën, mbikëqyrjen e aktivitetit dhe mbulimin e shpenzimeve. Poshtë tij vepronin persona të besuar, përgjegjës për transportimin e materialit nga provinca të tjera për të shmangur dyshimet.

Në nivelin më të ulët ishin kujdestarët e plantacioneve, të cilët kryenin edhe mbikëqyrje falë sistemit të instaluar të video-vëzhgimit. Rrjeti përdorte edhe persona të tjerë (testaferro) për të marrë me qira magazinat dhe automjetet, duke simuluar biznese të ligjshme magazinimi.

Gjatë kontrolleve u sekuestruan sasi të konsiderueshme parash, telefona celularë dhe dokumentacion i rëndësishëm për hetimin. Nëntë të arrestuarit, të gjithë shqiptarë të moshës 21–46 vjeç, u paraqitën para gjykatës më 4 dhjetor. Ata akuzohen për krime kundër shëndetit publik, vjedhje të energjisë elektrike, pjesëmarrje në organizatë kriminale, si dhe falsifikim dokumentesh për dy prej tyre për përdorim identitetesh të rreme.

Në operacion morën pjesë njësi të Policisë Gjyqësore të Casetas, Ekipi Kundër Krimit të Organizuar dhe Drogës (EDOA), njësitë USECIC nga Zaragoza, Huesca dhe Teruel, si dhe qentë antidrogë të Grupit Kinologjik të Zaragozës.