Korrupsioni 8 mijë euro, Apeli i GJKKO shton masën ndaj avokatit Besart Logu, i ndalon përkohësisht edhe ushtrimin e detyrës

Gjykata e Posaçme e Apelit për Korrupsionin dhe Krimin e Organizuar shton masën shtrënguese ndaj avokatit Besart Logu, i cili akuzohet për një korrupsion me 8 mijë euro, duke ia marrë një klienti të akuzuar për të ndikuar te prokurorët dhe gjyqtarët me qëllim lirimin e tij. 

Logu qëndron në masën arrest shtëpie me vendim të shkallës së parë të GJKKO, për veprën “ndikim i paligjshëm”,  por sot (29 shtator), shkalla e dytë njoftoi se ka vendosur edhe një tjetër masë ndaj tij.

“Me trup gjykues monokratik të përbërë nga gjyqtar Florjan Kalaja, sot më 29.09.2025, shpalli vendimin mbi çështjen penale nr. 68 akti, datë 22.09.2025 regjistrimi, mbi ankimin e personit nën hetim B.L., me objekt: “ankim ndaj vendimit dhe vendimit nr. 92, datë 11.09.2025, të Gjykatës së Posaçme të Shkallës së Parë për Korrupsionin dhe Krimin e Organizuar, me objekt: Marrjen në pyetje të të arrestuarit B.L.” dhe vendosi: Ndryshimin e Vendimit Nr. 92, datë 11.09.2025 të Gjykatës së Posaçme të Shkallës së Parë për Korrupsionin e Krimin e Organizuar. Caktimin ndaj B.L. të masës së sigurimit ndalues të parashikuar nga neni 243 i Kodit të Procedurës Penale, duke urdhëruar ndalimin e përkohshëm të ushtrimit të profesionit të avokatisë”, thuhet në vendimin e marrë nga Apeli i GJKKO-së.

LEXO EDHE: Avokati Besart Logu paraqitet në GJKKO, seanca e masës së sigurisë 'arrest në shtëpi' mbetet në fuqi

Më tej urdhërohet sekretaria gjyqësore që një kopje të këtij vendimi t’i njoftohet Dhomës Kombëtare të Avokatisë.

Avokati ka të drejtë që kundër këtij vendimi mund të bëhet rekurs në Gjykatën e Lartë brenda 45 ditëve. Logu e ka mohuar akuzën e ngritur si të pabazë dhe pa prova nga ana e SPAK-ut.

Aktualisht, Besart Logu ndodhet në “arrest shtëpie”, kurse ndalimi i ri i përkohshëm nga ushtrimi i profesionit, pritet të ketë ndikim të drejtpërdrejtë në aktivitetin e tij ligjor.