Avokati Besart Logu paraqitet në GJKKO, seanca e masës së sigurisë 'arrest në shtëpi' mbetet në fuqi

Avokati Besart Logu është paraqitur sot në Gjykatën e Posaçme Kundër Korrupsionit dhe Krimit të Organizuar (GJKKO), ku do të zhvillohet seanca për vlerësimin e masës së sigurisë ndaj tij.

Logu është ndjekur me masën e sigurisë “arrest në shtëpi” për veprën penale “ushtrim i ndikimit të paligjshëm”.

LEXO EDHE: 'Nën masë sigurie nga SPAK', Logu kundërshton akuzat: Nuk kam bërë asgjë të paligjshme, ky është një sulm politik dhe tentativë për të më kriminalizuar

Seanca nisi në orën 11:00, dhe gjykata sapo ka konfirmuar masën e sigurisë “arrest në shtëpi” ndaj avokatit.

Në seancë, Logu kërkoi një masë më të butë, duke argumentuar se është babai i dy fëmijëve të mitur, nuk rrezikon prishjen e provave të mbledhura më parë dhe nuk ka qëllim shmangien e drejtësisë. Kërkesa e tij nuk u pranua nga gjykata.

Avokati ka deklaruar dje se nuk ka kryer asnjë vepër penale dhe se do të vërtetojë pafajësinë e tij.

SPAK pretendon se Logu ka marrë 8 mijë euro nga një shtetas italian me premtimin se do të ndikonte tek vendimmarrja e prokurorëve dhe gjyqtarëve. Hetimi ndaj tij vijon, ndërsa SPAK dhe BKH po kryejnë kontrolle dhe verifikime të dokumenteve dhe elementëve të tjerë të hetimit.