Gjykimi për një nga ngjarjet e bujshme të ndodhura 4 vjet më parë në Vlorë mbërriti në shkallën e dytë në Tiranë.

Kështu Gjykata e Apelit Tiranë ka përfunduar gjykimin ndaj të 5 të akuzuarve për sulmin me armë ndaj Inez Hajrulla, ndodhur në 10 Maj 2019 në shëtitoren “Lungomare” në Vlorë. Vendimi ndaj 5 të akuzuarve është lënë i paprekur, duke lënë në fuqi vendimin e gjykatës së tre gjyqtarëve të Vlorës, Pëllumb Zaimi, Entela Gjoni dhe Adelajda Gjyzi.

Ditën e premte Gjykata e Apelit Tiranë, shpalli të deklarojë fajtor dhe dënojë me 35 vite burgim Daut Elmazin për akuzën e “Vrasjes në rrethana cilësuese” e kryer në bashkëpunim, e mbetur në tentativë.

35 vite burgim për Gentjan Dautaj (Zoto) për akuzën e “Vrasjes në rrethana cilësuese”, kryer në bashkëpunim mbetur në tentativë, mbajtjes pa leje dhe prodhimit të armëve, armëve shpërthyese dhe municionit.

30 vite burg për Igli Memaj (Suloti) për akuzën e “Vrasjes në rrethana cilësuese” e kryer në bashkëpunim e mbetur në tentativë.

Për të njëjtën akuzë më 25 vite heqje lirie janë dënuar edhe Serxhio Ademi (Cima) dhe Albano Goxhaj.

Atentati i 10 majit 2019 Ngjarja u regjistrua më 10 maj 2019 më parë në lagjen “Uji i Ftohtë” në Vlorë, ku Inez Hajrulla u qëllua me armë zjarri nga një automjet në lëvizje, teksa ishte ulur në një lokal. Hajrulla i shpëtoi atentatit, por u plagos rastësisht Dajko Cenodemaj që po pinte kafe në Lungomare me disa miq. Autorët pasi u larguan dogjën automjetin në Babicë të Vogël.

Sipas Policisë dhe Prokurorisë së Vlorës, në këtë ngjarje kanë marrë pjesë nëntë persona, Fatmir Hyseni, Daut Elmazi, nipi i Armando Sulejmanit, Igli Memaj, Gentian Dauti, Serxho Ademi, Albano Goxhaj, Dejvison Serjani, Ardjan Ahmeti dhe Xheladin Merko. Sipas prokurorisë së Vlorës, Inez Hajrulla në datën 10 maj 2019 ka qenë nën shoqërinë e Ervis Matodashajt, në ambientet e një lokali në Vlorë.

Pikërisht në këtë vend disa persona kanë qëlluar me armë me qëllim për të vrarë Inez Hajrullan. Nga këqyrja e vendit të ngjarjes ka rezultuar se në shesh janë gjetur dy gëzhoja dhe një fishek i pa goditur. Si pasojë e këtyre të shtënave është plagosur rastësisht Dajko Canodemaj.

Në ikje e sipër, autorët e këtij krimi që ndodheshin brenda një automjeti tip “Land Rover”, me ngjyrë jeshile dhe që në kokë mbanin maska, janë përplasur me dy automjete të rastit në afërsi të bashkisë Vlorë, dhe më pas kanë ikur në drejtim të fshatit Babicë.

Policia u është vënë në ndjekje këtij automjeti dhe në afërsi të fshatrave Babicë e Vogël dhe Çeprat, ky automjet është gjendur i djegur. Brenda në automjet ndodheshin dy automatikë të djegur plotësisht dhe një dorezë plastike e djegur pjesërisht. Për të zbardhur dinamikën e këtij krimi të rëndë policia dhe prokuroria e Vlorës kanë sekuestruar disa pamje filmike, nga të cilat evidentohet se mjeti “Land Rover”, afrohet dhe lëviz në shëtitoren e njohur “Lungomare” dhe në momentin që i afrohet lokalit, ndalon dhe nga dera e pasme e mjetit zbret një person.

Pikërisht në këtë moment, gjashtë persona që ishin ulur në tavolina ngrihen dhe ikin me vrap. Për këtë ngjarje vijon të jetë në kërkim Fatmir Hyseni, i kërkuar edhe si autor i ekzekutimit të Santiago Malkos në Tiranë. Edhe në këtë krim morën pjesë një ushtri me vrasës, të cilit i morën jetën pasi e ndoqën për minuta të tëra në mes të Tiranës, deri sa e ekzekutuan në afërsi të “Freskut”.