Në një lagje të qytetit të Calit në Kolumbi fshihej një nga shtetasit shqiptarë më të kërkuar nga autoritetet franceze. Interpoli e cilësonte si objektiv me vlerë të lartë. Lirido Ajazi, alias Mario, kishte mbërritur në Kolumbi disa muaj më parë dhe ndihej i qetë në vendin latin, pasi hyri pa probleme të mëdha dhe kaloi pa u vënë re nga autoritetet kolumbiane.

Mediat kolumbiane shkruajnë se gjithçka ka rrjedhur normalisht për shqiptarin, i cili shpenzonte shuma të mëdha parash, duke projektuar imazhin e një biznesmeni-turist me të ardhura të shumta. Ajazi shkonte në restorantet më të mira në Cali, në klubet më të njohura të natës dhe gjithmonë shoqërohej nga partnerja e tij, e cila do të përfundonte duke u bërë “thembra e tij e Akilit”.

Megjithatë situata e tij do të ndryshonte pasi një burim anonim do të informonte policinë për një takim të disa trafikantëve të rinj droge në vend, me median kolumbiane që e cilëson këtë si “samiti i mafias”. Mësohet se gjatë takimit Ajazi do të ofronte shërbimet e tij për transportimin e substancave për trafikantët drejt Evropës.

Gjatë komunikimit me homologët e tyre francezë, autoritetet kolumbiane morën raportin se shqiptari dyshohet se ishte përgjegjës për koordinimin e trafikimit të drogës nga ujërat e Paqësorit në Kolumbi përmes disa kontejnerëve të vendosur në Valle del Cauca, Cauca dhe Nariño.

Në dosjen e shqiptarit theksohet se ai ka partnerë shqiptarë, francezë dhe domenikanë të vendosur në Kolumbi, të cilët kanë akses në portet detare për të transportuar hidroklorurin e kokainës në vendet evropiane.

Vendndodhja e Ajazit ishte e vështirë për t’u gjetur nga hetuesit, pasi pas “samitit të mafias” ku dyshohet se kishte marrë pjesë, ai u zhduk pa lënë gjurmë. E vetmja e dhënë që kishin hetuesit ishte se trafikantët e drogës nga brezi i ri i Bogotas ishin takuar me shqiptarin në takim për të diskutuar dërgimin e kokainës jashtë vendit përmes aeroportit El Dorado.

Kur gjurmuan Ajazin, hetuesit zbuluan në të dhënat e tij të emigracionit se ai kishte hyrë tashmë në vend disa herë dhe se hyrja e tij e fundit ishte në dhjetor 2021. Nga hetimi rezultoi se shqiptari kishte një të dashur të re nga Jamundí, në Valle del Cauca, dhe megjithëse në atë kohë nuk e dinin se në cilin qytet ndodhej, një publikim që ata bënë në rrjetet sociale u dha detaje hetuesve për të zbuluar vendndodhjen e tij.

Pa dashur, Ajazi zbuloi detaje të rëndësishme nga jeta e tij për hetuesit, me postimet e vazhdueshme që po bënte në rrjetet e tij sociale. Shëtitjet në zonat e Valle del Cauca me të dashurën e tij e bënë më të lehtë për autoritetet të krijonin enigmën e rutinës së tij . Por çelësi i vendndodhjes së tij ishte një foto që ai postoi me të dashurën e tij, e cila u komentua nga një mik, i cili zbuloi se ata ndodheshin në Cali.

Për të shmangur një arratisje të mundshme të Ajazit, i cili në Kolumbi nuk kishte asnjë procedim penal, një operacion u zhvillua në lagjen El Limonar të Calit, ku u kap në një apartament që kishte marrë me qira. Dhe megjithëse në fillim ai donte t’u shmangej autoriteteve duke argumentuar se nuk dinte spanjisht, në fund ai pranoi se e kuptonte gjuhën.

Sipas hetimeve në Francë, Ajazi drejtonte një rrjet trafiku kokaine dhe heroine në Shqipëri. Kur ai u kap nga autoritetet kolumbiane, ai u njoftua se ishte në arrest për “mbajtje, transport, posedim, import dhe eksport të paautorizuar të lëndëve narkotike dhe pjesëmarrje në një organizatë kriminale me qëllim kryerjen e një krimi”. Arrestimi i Ajazit ndezi alarmin në vend pasi ai ishte shqiptari i dytë i kapur në më pak se një muaj me një urdhër ndërkombëtar për krime të lidhura me trafikun e drogës.