Rishi Sunak tha gjithashtu se numri i emigrantëve shqiptarë që mbërrijnë me varka të vogla ka rënë me pothuajse 90%, dhe se një marrëveshje me Shqipërinë ka bërë që 1800 azilkërkues të kthehen mbrapsht në vendin e tyre.

Qeveria e Mbretërisë së Bashkuar do të strehojë më shumë azilkërkues nëpër platforma ujore, tha të hënën kryeministri Rishi Sunak.

Dy platforma shtesë do të strehojnë rreth 1,000 emigrantë, tha Sunak, së bashku me një që do të ankorohet në Portland në Anglinë jugore brenda dy javëve të ardhshme, njofton Euronews.

Qeveria thotë se vendimi synon të kursejë miliona nga paratë e taksapaguesve që shpenzohen aktualisht për strehimin e azilkërkuesve në hotele në të gjithë vendin.

Sunak tha se, krahasuar me të njëjtën kohë të vitit të kaluar, numri i njerëzve që bëjnë kalimin e rrezikshëm detar me anije të vogla nga Franca veriore në bregdetin jugor anglez deri më tani këtë vit është ulur me një të pestën.

Ai pretendoi se Britania e Madhe po vepronte më mirë se vendet e tjera në Evropë, ku tha se kalimet e paautorizuara të emigrantëve janë rritur me një të tretën gjatë së njëjtës periudhë.

Shifrat nga Home Office tregojnë se rreth 7,600 njerëz u zbuluan duke kaluar Kanalin Anglez deri më tani këtë vit, krahasuar me pothuajse 10,000 qershorin e kaluar.

Megjithatë, është e vështirë të thuhet nëse ulja ishte e lidhur me politikat e qeverisë së Sunak apo faktorë të tjerë si kushtet e motit. Muajt e verës zakonisht tregojnë shifra shumë më të larta të emigrantëve që e ndërmarrin udhëtimin e rrezikshëm.

Sunak tha gjithashtu se numri i emigrantëve shqiptarë që mbërrijnë me varka të vogla ka rënë me pothuajse 90%, dhe se një marrëveshje me Shqipërinë ka bërë që 1800 azilkërkues të kthehen prapa.

Shumë prej azilkërkuesve që mbërrijnë në Mbretërinë e Bashkuar çdo vit vijnë nga zonat e konfliktit, duke përfshirë Afganistanin dhe Sirinë, megjithëse një numër i madh vijnë nga Shqipëria, të cilën qeveria e Sunak e përshkruan si një vend "të sigurt".

Udhëheqësi i Laburistëve të opozitës Sir Keir Starmer akuzoi qeverinë se po promovon një "politikë që nuk funksionon", e cila "po i kushton një pasuri të tërë, taksapaguesve".

Sunak e ka bërë "Stop barkave" një nga politikat e tij kryesore që kur mori detyrën në tetor. Qeveria e tij po nxit një projekt-ligj të debatueshëm për migracionin, që synon të frenojë në mënyrë dramatike aftësinë e emigrantëve për të kërkuar azil në Mbretërinë e Bashkuar.

Kritikët, duke përfshirë agjencinë e OKB-së për refugjatët, e kanë dënuar këtë projektligj si joetik dhe të pazbatueshëm dhe disa thonë se shkel ligjin ndërkombëtar./ar.sh/SYRI.NET