Akuzohet se ka përvetësuar 3 milionë euro të klientëve të një poste private, gjykata lë në burg Alma Beqirajn. Por pala mbrojtëse e të arrestuarës, ka deklaruar se akuzat nuk qëndrojnë.
Nga SYRI TV
Lihet në burg Alma Beqiri, e cila dyshohet se përvetësoi 3 milionë euro, para të klientëve të një poste private ku punonte. Gjykata e Korçës pranoi kërkesën e prokurorisë, duke vlerësuar të ligjshëm arrestimin e 46-vjeçares.
Por pala mbrojtëse e së akuzuarës, avokati Jordan Daci ka deklaruar se akuzat ndaj klientes së tij nuk qëndrojnë.
Alma Beqiri u arrestua pas një hetimi dymujor, pasi dyshohet se ka vjedhur shuma monetare në lekë dhe valutë, duke mashtruar bizneset të cilat operonin online dhe dërgonin porositë e tyre tek klientët në Korçë.
46-vjeçarja, me detyrë agjente e shërbimeve postare private, shpërndante pako të ndryshme postare, për llogari të subjekteve të treta dhe shumat monetare që i arkëtonte nga klientët, nuk i ka derdhur në llogarinë e subjekteve tregtare shitëse dhe as tek kompania që kryente këtë shërbim.
Shumën e konsiderueshme të përfituar kjo shtetase dyshohet se e ka investuar në blerjen e pasurive të paluajtshme dhe të bizneseve tregtare, në emër të vet dhe të familjarëve të saj.
© SYRI.net