Gjendja e sigurisë dhe rendit në vend, veçanërisht gjatë ditëve të fundit, ka ndezur një debat mes deputetëve të opozitës dhe ministrit të Brendshëm, Bledi Çuçi. Gjatë prezantimit për projektligjin për “Agjencinë e Mbikëqyrjes Policore”, ministri tha se ajo ka për qëllim krijimin e një strukture profesionale, transparente dhe të paanshme për mbikëqyrjen e veprimtarisë së subjekteve të parashikuara.

Por, deputetët e opozitës kërkuan nga Çuçi një reagim për vrasjen e biznesmenit në Fier dhe grabitje e biznesmenit në Nikël të Fushë-Krujës, pasi sipas tyre qytetarët po ndihen të frikësuar për jetën.

Deputeti i Fierit, Luan Baçi, ngriti pretendimin se gjatë ekzekutimit të biznesmenit Demir Backa në qytetin e Fierit, në vendin e ngjarjes ka qenë prezente dhe një patrullë Policie. Deputeti theksoi se në qytetin e Fierit përflitet se efektivët janë fshehur në momentin që kanë nisur të dëgjojnë të shtënat.

“Rasti i Fierit, në fakt është vrarë një biznesmen. Për hir të së vërtetës ka qenë një orë goxha e populluar dhe pranë një qendre tregtare. Aty është një vend që ka një shërbim të përhershëm policor. Aty ka qenë një shërbim policor, i cili sipas të gjithë informacioneve nuk ka reaguar. Madje në qytetin e Fierit flitet se ata janë fshehur kur kanë qenë prezentë në një krim makabër”, tha Baçi, ndërsa pyeti ministrin dhe shefin e SHÇBA-së, nëse ishin në dijeni të këtij informacioni dhe a kanë nisur një hetim të brendshëm në lidhje me rastin.

Por, ai nuk mori një përgjigje nga asnjëri prej tyre, të cilët u fokusuan te rendi ditës në mbledhje dhe nuk pranuan të komentonin më tej. Për deputetin Flamur Noka, Ministria e Brendshme ka mungesë vizioni për mënyrën se si e shikon të ardhmen e sigurisë publike.