U denoncuan me pamje dhe zë një ditë më parë, sot janë vënë në pranga.

Gjyqtari i Gjykatës së Fierit, Roland Hysi dhe psikologia e kësaj gjykate, Elona Meçani janë vënë në pranga gjatë ditës së sotme.

Është Policia e Shtetit që ka bërë të ditur arrestimin e Hysit dhe Meçanit.

Njoftimi i Policisë së Shtetit:

Drejtoria Hetimore Qendrore në bashkëpunim me Drejtorinë Vendore të Policisë Fier dhe Tiranë kryen ekzekutimet  e vendimeve të Gjykatës së Shkallës së Parë për Krime të Rënda Tiranë Nr.5, datë 09.01.2019 e cila ka vendosur masën e sigurisë “Arrest me burg” për shtetasit:

- Roland Hysi, 50 vjeç, banues në Tiranë, me detyrë gjyqtar në Gjykatën e Shkallës së Parë Fier;

- Elona Meçani, 28 vjeçe, banuese në Fier, me detyrë psikologe, pranë Gjykatës së Shkallës së Parë Fier.

Gjykata ka vendosur masën e sigurisë "Arrest me burg"  për veprat penale  “Korrupsioni pasiv i gjyqtarëve  prokurorëve dhe funksionarëve të tjerë të organeve të drejtesisë" dhe "Ushtrimi i ndikimit të paligjishëm të personave që ushtrojnë funksione publike”.

Ata ndodhen të ndaluar në Drejtorinë Vendore të Policisë Tiranë.

Gjyqtari i Fierit Roland Hysi i kërkonte seks një gruaje për t’i dhënë kujdestarinë e fëmijës.

Në kamerën e fshehtë përfshihen disa gjyqtarë dhe psikologia Elona Meçani, që bën edhe rolin e sekseres.

Po kështu zonja i jep psikologes 500 euro për Hysin, duke i premtuar edhe 500 euro të tjera në mbyllje të gjyqit.