Kupa e Botës 2026 do të mbahet mend jo vetëm për triumfin e Spanjës, por edhe për numrin e madh të rekordeve historike që u vendosën gjatë turneut. Nga Lionel Messi dhe Kylian Mbappé te Cristiano Ronaldo, Rodri e Unai Simón, shumë protagonistë hynë në historinë e Botërorëve.

Dick Advocaat, trajneri më i moshuar në histori

Holandezi Dick Advocaat u bë trajneri më i moshuar që ka drejtuar një skuadër në një Botëror. Ai udhëhoqi Curaçaon në moshën 78 vjeç e 271 ditë, duke kaluar rekordin e mëparshëm të Otto Rehhagel.

Bellingham, Kane, Dembélé dhe Mbappé, një rekord i paprecedentë

Jude Bellingham dhe Harry Kane u bënë dy shokët e parë të skuadrës që shënojnë nga gjashtë gola secili në të njëjtin Botëror. Më pas këtë arritje e përsëritën edhe francezët Ousmane Dembélé dhe Kylian Mbappé.

Didier Deschamps, trajneri me më shumë ndeshje

Didier Deschamps u bë trajneri me më shumë ndeshje të drejtuara në historinë e Kupës së Botës, plot 26, duke kaluar Helmut Schön. Ai vendosi gjithashtu rekordin për numrin më të madh të fitoreve si trajner në Botëror.

Johan Manzambi, zëvendësuesi më i ri që shënon dy gola

Sulmuesi zviceran Johan Manzambi hyri në histori si zëvendësuesi më i ri që realizon dy gola në një ndeshje të Botërorit. Ai e arriti këtë në moshën 20 vjeç e 247 ditë.

Kylian Mbappé, golashënuesi më i mirë i të gjitha kohërave

Me 22 gola në Kupat e Botës, Kylian Mbappé u bë golashënuesi më i mirë në historinë e turneut. Francezi e mbylli garën një gol përpara Lionel Messit, duke kaluar rekordin e mëparshëm të Miroslav Kloses.

Lionel Messi, rekord pas rekordi

Edhe pse humbi vendin e parë në renditjen e golashënuesve, Messi vendosi disa rekorde historike:

• U bë futbollisti me më shumë fitore në Kupat e Botës (23).
• Shënoi në nëntë paraqitje radhazi në Botëror, rekord absolut.
• U bë lojtari me më shumë gola nga jashtë zone në historinë e turneut, plot shtatë.

Michael Olise, mbreti i asisteve

Anësori i Francës, Michael Olise, vendosi rekord me shtatë asiste në një edicion të vetëm të Kupës së Botës, duke kaluar legjendën Pelé, i cili kishte gjashtë në vitin 1970. Pesë nga këto asiste shkuan për Kylian Mbappé-në, një rekord më vete për bashkëpunimin mes dy lojtarëve.

Rodri, mjeshtër i pasimeve

Mesfushori i Spanjës, Rodri, realizoi 790 pasime të sakta gjatë turneut, rekord absolut për një edicion të vetëm të Botërorit. Ai përmirësoi rekordin e tij të mëparshëm prej 638 pasimesh në Katar 2022.

Cristiano Ronaldo, i pari që shënon në gjashtë Botërorë

Në moshën 41-vjeçare, Cristiano Ronaldo u bë futbollisti i parë në histori që gjen rrugën e rrjetës në gjashtë edicione të ndryshme të Kupës së Botës. Portugezi u bë gjithashtu golashënuesi i dytë më i moshuar në historinë e kompeticionit, pas Roger Milla-s.

Eloy Room, 16 pritje në një ndeshje

Portieri i Curaçaos, Eloy Room, barazoi rekordin për numrin më të madh të pritjeve në një ndeshje të Botërorit, plot 16, ndaj Ekuadorit. Ai e arriti këtë në 90 minuta, ndërsa rekordi i mëparshëm i Tim Howard ishte vendosur pas 120 minutash.

Unai Simón, portieri më i pakalueshëm

Portieri i Spanjës, Unai Simón, vendosi një rekord të ri me shtatë ndeshje pa pësuar gol në tetë takime të luajtura. Falë tij dhe mbrojtjes së përbërë nga Pedro Porro, Aymeric Laporte, Pau Cubarsí dhe Marc Cucurella, Spanja pësoi vetëm një gol gjatë gjithë turneut, duke regjistruar mbrojtjen më të mirë në historinë e një skuadre kampione bote. Ky rekord përmirëson arritjen e Francës (1998), Italisë (2006) dhe Spanjës (2010), të cilat kishin pësuar nga dy gola në rrugën drejt titullit.